Marin hnehin An Se-young a champion

South Korean tleirawl An Se-young chuan Pathianni zan khan badminton khawvel barakhaihin Carolina Marin a hneh a, kum 17 mi hi a vawi khat nan French Open champion a ni.

France khawpui Paris-a inkhelah An Se-young hian Olympic champion lai Marin hi darkar khat leh minute kua an inkhelh hnuah 16-21, 21-18,-21-5 in a hneh a, atan world champion vawi thum ni tawh hneh hi chanchin lawmawm bik a tling.

Mipa singles lamah Rio Olympics champion leh seeded pangana ni bawk Chen Long chuan minute 51 chhungin Indonesia tlangval Jonathan Christie chu 21-19, 21-12 a hnehin a champion ve bawk. India tlangval pahnih Satwiksairaj Rankireddy leh Chirag Shetty ten doubles final an lut a, mahse nomawi inchuhna inkhelah seeded pakhatna Marcus Fernaldi Gideon leh Kevin Sanjaya Sukamuljo te ṭangdun chu 18-21, 16-21 in an ngam lo.