Zanin dar 7-ah inkhel hmuhnawm bik Mizoram Police Vs Chanmari

Mizoram Premier League-ah zanin dar 7:00 hian Mizoram Police leh Chanmari FC te an inkhel dawn.

Police hi match thum a zawnin an chak lo tawh a, Chanmariin match hnuhnung berah Electric Veng an hneh lo. Tun hnaiah result ṭha nei lo mah se club pahnih hi champion rinkai an ni tho a, player nei ṭha an nih miau avangin zanin Lammuala inkhel tur hi tualchhung football ngainatute tan chuan en ngei chi a ni.

Mizoram football season ṭanna atana hman MFA Super Cup-ah Mizoram Police leh Chanmari FC te an inhmachhawn a, Lalbiaksanga Colney kaihhruai Police an champion - hei hi 2012 Independence Day Football hnua an champion leh hmasak ber a ni.

Team ṭha pahnih hi season ṭan dawna MPL champion tura rinkai an ni a, amaherawhchu kumin I Day Football-ah group khatah awm dunin group stage an paltlang lo. MPL-ah pawh semifinal lut lo thei dinhmunah an ding ve ve a, team pahnih hian pressure an ngah ta hle.

Chanmari manager Lalhmangaiha Sailo chuan, "Police hi huphurhna kan nei lo a, chak loh inrinna pawh kan nei lo. Goal venhim ringawt ngaihtuah thei dinhmunah kan ding lo a, goal khung hi kan thupui ber tur zawk a ni," tiin Vanglaini a hrilh.

Police ngaihdanpawh chuti tho - Lalbiaksanga Colney chuan, "Kan ṭhat theih dan berin kan khel dawn. Kan khelh dan hmang pawh kan siksawi dawn a, training-naah pawh nasa takin hma kan sawn," tiin chak tuma an khelh tur thu a sawi ve bawk.

Mizoram Police hi an chak lo nawn leh a nih chuan paruknaah an awm chhunzawm dawn a, season ṭan hmaa chiang saa ngaih semifinal 'spot' pawh chelh phak a har ṭalh dawn.

Chanmari pawh an chak lo a nih chuan Police hnuaiah an awm dawn. S. Malsawmtluanga'n banna a thehluh khan point 8 an hmu a, table-a sang ber Chhinga Veng chu point khat chauhin an pha lo. Tunah match hnih khel leh tawhin hmahruaitu Aizawl FC chu khelh zat inangah point liin an pha lo a, hnungtawlh zawnga an kal zel loh nan insiamṭhat an mamawh hle.