Police-ah fuh lo a awm?

MPL round 7 khelh zawhah Mizoram Police hian goal 11 an khung a, an chungah hian Chhinga Veng (14), Electric Veng (12) leh Chanmari FC (12) te awm mah se hmahruaitu Aizawl FC goal khung zat goal 11 an khung.

Police-in result ṭha an neih loh chhan erawh goal an khung theih loh vang a la tih theih tho a, FC Venghnuai leh Aizawl FC an hneh loh ṭumin goal an khung lo. Goal khung harsat hi Police nen a inhmeh lo. F. Lalrinpuia'n (Valpuia) MPL4-ah mimal lawmman best player, top scorer leh best forward te hui vekin MPL1-ah best forward a ni bawk.

MPL2 leh MPL3-ah Police winger Lalbiakhlua'n (Biaktea) goal a khung tam ber a, MPL6 leh MPL7-ah Lalfakzuala top scorer a ni a, Police captain hian hrem vanga FC Venghnuai a hmachhawn theih loh hnuah a rawn lut dawn.

Police forward Malsawmfela lah MPL3-ah best forward atan thlan a ni a, MPL5-ah best player leh best forward la kawpin hemi ṭuma top scorer Laldampuia Tochhawng goal khung zat goal 11 a khung ve bawk.

Goal khung thei rual chawm tur hian R. Malsawmtluanga an kawl a, MS-a hi MPL2 leh MPL6-ah best player a ni a, an sulhnu en chuan goal khung harsatna nei tur an ni lo. Police tlarhnung pawh inenfiah an mamawh hle. Tun season MPL match sarih an khelh tawhah goal an la chhuah vek a, insiamrem an mamawh hle.