Tlai dar 4-ah a thiam pahnih

Mizoram Premier League Season 8-a khel mawi pahnih Aizawl FC leh Electric Veng FC te vawiin tlai dar 4:00 hian an inkhel dawn.

I League club Aizawl FC hian tun season-ah hneh loh an la tawng lo a; Chhinga Veng, Electric Veng leh Chanmari FC nen an inhnehtawk tih loh chu an la chak vek. Lalsangzuala Hmar enkawl Electric Veng pawhin Chhinga Veng chiah hneh loh an la tawng.

Standly Rosario-a'n thiam takin Aizawl FC rawltharte a chhawr a, inrintawkna nei chho zelin round 7 a nih meuh chuan an inkhel a nung tawh hle. Match hnuhnung bera Ramhlun North an bitum ṭum pawhin an khingpuiin goal venhim tawp tum mah se goal khung dan kawng an hre tho.

Tun season-a I League club ṭhatna erawh goal nawr ni loin chu goal venhim an thiamna hi a ni a, goal thum chauh an la chhuah. Ugandan defender Richard Kassaga hoin tlarhnung a phui ṭha hle. Electric Veng pawh Aizawl FC ang thoin tlarhnung leh hma a rual ṭha - goal nga chauh la chhuahin I League club aiin goal khatin an khung hnem zawk (12 goals).

Tun season-ah ṭum hnih an inkhel tawh a, I Day Football group stage leh MPL-ah goal awm loin an inhnehtawk ve ve. Tun ṭumah pawh hian fimkhur taka an khel leh a nih chuan result ngai hi thleng nawn thei a ni.