Kenin duhthusam a thleng dik ta

Sofia Kenin chuan Grand Slam final a khelhna hmasa berah hnehna a chang. American player hian Australian Open final-a a hmachhawn Garbine Muguruza lakah set hloh hmasa mah se tho chhuak lehin a champion.

Inrinni tlai khan Rod Laver Arena-ah nomawi inchuhna neih niin, seeded 14-na Kenin hian set hmasa ber a hloh. Amaherawhchu, darkar hnih leh minute thum an inkhelh hnuah 4-6, 6-2, 6-2 a tho chhuakin nomawi a chawi.

Melbourne Park-ah rin hlawh tak ni lem loin Kenin a inlan a, a theihna lo hmu fuh hmasa tute erawhin a chungah rinna an nghat ngam thung. Nikum November thla khan kum 21 a tling ve chiah - Maria Sharapova (2008) hnuah Australian Open khel thei naupang ber a ni hial.

Set a hloh hmasak avangin chiai thei tura ngaih a ni. Mahse, world number 1 Ashleigh Barty hneha final lut thei a nihna lantirin huaisen takin a dingnghet. Match point a hmuh hmasa chhawr ṭangkai lo mah se a vawi hnihnaah chuan Grand Slam vawi hnih champion tawh Muguruza double fault vangin a chak.

Kenin chuan, "Ka duhthusam chu a tak ramah a chang ta, tun chawlhkar hnih chhung ka hman dan hi a mak hle. Duhthusam leh suangtuahna i nei a nih chuan chumi chu tih tum rawh, a takin a rawn thleng mai ang," a ti. Kenin hi Grand Slam inelna hnuhnung 12 aṭanga champion thei player pariatna a ni.

Russia khawpui Moscow-a piang a ni a, an ramah an duh anga an zalen tawk loh avangin Kenin-i pa Alexander chuan United States lamah an chhungkua a pem pui, a fanu theihna sang tak a hmu fuh; chumi ti hlawhtling tur chuan US an pan tihna a ni.

Hnehna a chan hnuin Kenin hian apa a pan nghal a, lawm avanga a biang mittui luang a dang zo lo. Kenin chuan, "Ka lawm takzet, kumkhuain he thil hi kan inṭawm ang," tiin a nomawi chawi chu a pa vang a ni tih a sawi chhuak.

Kenin hian a naupan lai aṭangin theihna a nei sang, kum sarih mi chauh a nih laiin training-na hmunah American star Andy Roddick-a service a vaw let thei tawh! Training-na bikah chuan John McEnroe, Venus Williams leh Kim Clijsters te kiangah pawh a lo khel tawh.

World number 1 hlui Clijsters chuan, "Player ropui thar a la ni thei ang," tiin 2005 daih tawh khan Kenin-i video tawi chu a lo tarlansak tawh, tunah chuan Russian fanu - American ni ta hi world ranking chhuak tharah chuan a sang 10 zingah a tel tawh ang.

Men's Singles    Novak Djokovic

Women's Singles    Sofia Kenin

Men's Doubles    Rajeev Ram

    Joe Salisbury

Women's Doubles    Timea Babos

    Kristina Mladenovic

Mixed Doubles    Barbora Krejcíkova

    Nikola Mektic

Inelna    Champion    Pahnihna

Singles    Rs 29,45,75,880    Rs 14,76,45,435

Doubles    Rs 5,43,39,240    Rs 2,71,69,620

Mixed Doubles    Rs 1,35,84,810    Rs 71,49,900

Note : Mipa leh hmeichhe singles lawmman zat hi a inang.