Venghnuai = Chhinga Veng

MPL champion tawh Chhinga Veng FC leh kai thar FC Venghnuai te chu tun season-a a vawi hnih nan nimin khan 1-1 in an inhnehtawk - round 2-ah khan 1-1 thoin an inhnehtawk tawh.

Chhingcows hian point khat an hmuh zarah point 13 hmuin pathumnaah an awm chhunzawm a, FC Venghnuai pawhin point 10 hmuin pangana dinhmun an luah zel. Lammual inkhelah Venghnuaiin chance ṭha an nei hmasa a, minute hnihna lekah Thangzawmsanga'n goal ban a pet per nghal. 

Chhinga Vengin goal an khung hmasa thung a - Ouattara Sie aia lut MC Malsawmzuala'n minute 5-na lekah tun season-a a goal rukna a tauh lut. Siaha tlangval hi MPL8-ah goal khung tam ber a ni chhunzawm zel.

Venghnuai tan Vanlalthanga bawk a vul a, minute 13-naah box pawn aṭangin kawh zetin goal kilah tak a khung. Hualngohmun tlangval hian season liam ta khan goal ruk a khung a, tun season-ah goal thum a khung leh ta bawk.

Team pahnih an fimkhur a, Chhinga Vengin inkhel thunun hret chungin goal hlauhawm hmuh tur a tam lo. 

Hun tawp hma hretin man of the match-a thlan Chhingcows midfielder Lalsawmzela'n chakna goal khungna remchang a nei a, Venghnuai keeper RS Lallawmzuala'n a dan sak.