Anfield-ah buaina nei Arsenal
Zanin dar 1:00 hian League Cup last 16 khel turin Liverpool chuan Arsenal an mikhual dawn a, team pahnih hi boruak inang lo tak hip mek an ni - chak vanga hlim leh buaina nei lai an ni.
Reds hian 2012 hnua a vawi khat nan League Cup champion nih leh an tum a, an mikhual Gunners hi he inelna bika an champion hnuhnung ber chu 1993 daih tawh kha a ni. Tun hnaiah eng nomawi pawh chawi a harsat avangin zanin match hi an ngai thutak ang.
Boruak ṭha
Tottenham laka si an phurh hnuah Liverpool an tho chhuak a, hnehna an chan hnuah captain Jordan Henderson chuan, "Rilru nguai taka kan awmna kha nasa takin a danglam tawh, tunah chuan kan rilru put hmang a dik," tiin Jurgen Klopp kaihhruaina hnuaia an boruak hip a danglam thu a sawi.
Spurs an hneh ṭuma inhliam Mohamed Salah leh Virgil van Dijk te chhawr an nih a rinawm loh a, defender rinrawl pakhat zawk Joel Matip a la inlan theih dawn loh bawk avangin tlarhnung lai chu an ṭhat dan ber a ni dawn lo.
Player hliam ngah mah se an intawn hnuhnung vawi kuaah Reds hian chak loh an nei lo, inrintawkna an nei dawn. Chutihrualin Premier League nomawi duha tuihal an ni a, Champions League ngaih pawimawh tur an neih bawk avangin Gunners lakah an ṭhat dan berin an inlan a rinawm loh.
Boruak ṭha lo
Crystal Palace nen an inhnehtawk ṭumin Arsenal captain Granit Xhaka a titau a, manager Unai Emery-a'n captain atan a hmang zui dawn em tih a la sawi chiang ngam lo. Spanish manager hian amah maiin captain buaina a chingfel ngam lo a, club thuneitu lam a be rawn tel dawn.
Paris St-Germain manager hlui hi Mesut Ozil chhawr duh lotu a ni a, a player duhsak tak Xhaka a bengdai thei lo leh bawk a nih chuan fans lamin an club enkawl zel tur atan an duh hran lo ang - zaninah an tlawm zui leh a nih chuan an hliam chu dam aiin punlun lam a pan a rinawm.
Emery-a'n player a siksawi nasat a rinawm, defender Hector Bellerin leh Rob Holding te an dam tawh a, rawlthar Bukayo Saka leh Gabriel Martinelli ten khelhna hmun an chan leh ngei a rinawm bawk; Xhaka dinna hmunah Lucas Torreira-a'n khelhna hmun a chang bawk ang.