Cristiano thlak a awlsam lo

Real Madrid-in tun season-ah beisei angin an la khel chhuak thei lo a, Cristiano Ronaldo thlak tura an lakluh Eden Hazard pawhin beisei angin a la khel chhuak lo. 

Belgian forward hian Ronaldo hmingthanpui hnu jersey number 7 a ha a, Chelsea-a khelh laia Premier League player langsar ni reng thei a nih avangin beiseina pawh a sang. Mahse, Hazard a ṭawng chhuak a, Belgian forward chuan, "Cristiano khan sulhnu tam tak a hnutchhiah a, a jersey number chhawmtu nih hi thil awlsam a ni lo," tiin a sawi. 

Hazard thusawi dikna chu Ronaldo chhuah hnua Real result-in a nemnghet a, tun season-ah pawh eng ruai an la ang thei lo. 

Real hian season hmasa ṭan dawn khan Ronaldo an chan a, a rual hian coach Zinedine Zidane chuan Santiago Bernabeu a chhuahsan ve bawk. Madrid khaw club thuneituten Portuguese forward hmun ruak hi hnawhkhah theih maiah an ngai a, coach atan Spain coach Julen Lopetegui an thlem lut zui. 

Spanish manager-in an beisei ang result a pe lo a, Argentine coach Santiago Solari an ruai zui. Mahse, reserve team coach aṭanga an lakluh coach hian an beisei ang result a pe bik lo. Real president Florentino Perez-a'n Zidane lam a hawi a, French manager hi thil tam tak tiam chungin an lalet - mahse tun thlengin beisei ang result a la pe bik chuang lo. 

Real hian Ronaldo sulhnu hnutchhiah ropui tak chhui zui turin Eden Hazard an lalut zui a, mahse Chelsea forward hian tunah rih chuan a theihna sang ber angin a la khel lo. Hazard hian tun season-ah match sarih khelin goal khat chiah a la khung a, beisei a phak lo hle. Mahse, Belgian forward a beidawng duh lo a, nomawi chawi a tum thu a sawi!

Belgium tan vawi 104-a inlana goal 30 khung thei forward chuan, "Nomawi chawi ngei kan mamawh a, kan tum ram kan thlen theih nan kan theihna zawng zawng kan hlan ang. "Khawvela club ṭha ber tana khel ka ni a, ka theihna sang bera ka khelh theih ka beisei," a ti zui - tun thlengin a beiseina erawh a la hlawhtling lo. 

Julen Lopetegui-a'n Real a pan tirh khan Ronaldo hmun ruak luah tur chu Gareth Bale a nih thu a sawi a, mahse Welsh forward hi hliamin a ti buai ṭhin bawk nen Lopetegui beisei angin a khel chhuak lo. Zidane-a lo kir chiah khan Bale-a'n hmun pawimawh a chan a rinawm lo nghal a, nipui transfer laia an thawm neih phei chu Spanish media ho titi tui ber a tling. 

French manager-in Bale a mamawh loh thu a sawi a, Chinese Super League lam hawiin Welsh forward-in a thawmhnaw a rem fel hman. Mahse, Perez-a'n a thlawna Bale chhuahtir a phal lo a, rin loh deuhin Bale a cham thut! Chu aia mak zawk chu Zidane-a'n a player duh loh hi a chhawr rim a, Real tan bul ṭantu regular a ni!

Bale-a'n Real-ah hmun pawimawh a chang zui chungin Bernabeu-ah a hlim tak tak lo nia sawi thawm a awm reng a, Zidane nen an inhmu thiam lo leh tawh nia sawi a awm. Bale hi Club Brugge nen Champions League match an khelh ṭumin squad-ah telh a ni lo a, hei vang hian Zidane chungah a lungawi lo - Bernabeu-ah inkhel en tura thupek a ni tho a, tlai taka a thleng lai thla an lo la hman. 

Spanish chanchinbu lar Marca chuan Bale hian a agent Jonathan Barnett chu chhuahna tur ngaihven turin a hrilh niin an sawi a, January-ah China lam pana chhuah a duh! Hazard-a'n beisei a phak lo a, Bale-a'n thawm a nei reng a, Real boss Zidane tan a harsa ang tih a chiang - he buaina hi an chinfel vat loh chuan Hazard beisei angin nomawi an chawi kher lo ang. 

Bale hian hliam vangin an match hnuhnung pahniha Galatasaray leh Mallorca an hmachhawn ṭumin khelmual chhung a rap thei lo a, he thu buatsaih thleng hian Madrid-in a dinhmun chungchangah thuchhuah an la nei lo. Spanish danah mimal hriselna dinhmun hi in puanzarsak lo tura dan theih a ni a, hemi chungchangah hian Bale chuan Real thuneitute chu a medical record thup turin a ti niin an sawi. 

Bale hian Thawhṭanni zing khan club training chu a zawm ngei a, mahse a hnuah London lam pan thlawhtheihnaa a chuang tur thlalak chu media lamin an nei leh hman. Madrid chuan Bale hi mimal thil avanga a zinchhuah an phalsak thu an sawi a, he thu buatsaih lai hian zanin dar 1:45-a Leganes an mikhual turah a inlan theih dawn leh dawn loh kan hre hman lo.