Chelsea leh Manchester United an intawng leh dawn ta e

Frank Lampard hnuaia Chelsea-in Premier League match an khelh hmasak berah Manchester United 4-0 in an hneh lo. Zanin dar 1:35 hian League Cup last 16-ah Blues-in Ole Gunnar Solskjaer hote Stamford Bridge-ah an mikhual dawn a, phuba lakna remchang a ni thei ang.

Chelsea-in a inkhelh hunlaia an chhuan tawlawl Lampard chu manager atan lungsi takin an thlang a, Premier League match hmasa berah an hmelma kum hlun Manchester United an tlawh. Tun season Premier League match hmasa berah Marcus Rashford-a'n goal hnih a khung a, Anthony Martial leh Daniel James ten goal khat ve ve khung bawkin Chelsea player-te'n goal an khung ve lo. 

Kut bengin Chelsea an haw a, zahna kawn aṭangin bul an ṭan. Heti chung hian Super Frankie erawh a nghing lo. A ngaihdan nghet tak chu kaltlang puiin rawlthar player chungah rinna a nghat chhunzawm a, zanina Manchester United an mikhual leh meuh chuan chak tura rinkai zawk an ni leh der tawh.

Lampard-a hnuaiah striker Tammy Abraham, midfielder Mason Mount leh defender Fikayo Tomori te chu a tikimtu ni ringawt loin club dang tana pawha chil ti put pha khawpin khelmualah an tlangnel. Inhliam vanga season tira inlan lo Callum Hudson-Odoi a dam leh tawh a, Bayern Munich awh English winger hi a kum phu loin a puitling tawh. Tun dinhmuna an player langsar ber erawh Christian Pulisic a ni a, American winger hian Premier League-a bul a ṭan hmasak berah hattrick a siam.

Chelsea hian United laka phuba lak an duh a nih chuan tun hi a hun tak niin a lang a, Dutch champion Ajax hnehtu hian United mikhual hun an nghakhlel ang.

Manchester United-in December hma chu Paul Pobga an chhawr thei dawn lo a, player dang Luke Shaw, Nemanja Matic leh Axel Tuanzebe te pawh an la dam lo. Chutihrualin United-in ngai an awh chho a, Liverpool nen an inhnehtawk hnuah khualmualah Partizan leh Norwich City te an hneh leh tawh. Tlarhmaah Anthony Martial a awm leh theih tawh avangin buaina chhum zing ṭhenkhat chu chhem kianin a awm.

League Cup-ah hian player khel tlem zawkte an chhawr ṭhin avangin sa huai an ser chu a rinawm lo a, chutihrualin club lian inhmachhawn tur a nih avangin an ṭha thawkhat ang. Minute 90 chhunga chak zawk an awm lo a nih chuan penalty pet nghal tur a ni a, United forward pahnih Marcus Rashford leh Martial ten match hnuhnung berah penalty an hlah ve ve.