Lebanon prime minister Saad Hariri a bâng

Lebanon sorkar laka lungawi lo ten kar hnih chuang nawrh an huaihawt hnuah, Thawhlehni khan President Michel Aoun hnenah Lebanon prime minister Saad Hariri chuan, PM a nihna aṭang a banna a thehlut.

Nawrh huaihawtte hian sorkar chu eiruknaa fihlim lo leh, ram economy enkawl thiam lohah an puh a ni. President Anoun chuan nawrh huaihawtte hi inbiakpuiah lo sawm tawh mah se, inbiakna neih hmain sorkar chu bang phawt turin an phut a ni.

Hariri a ban thu hi nawrh huaihawtte hian an hriat veleh a lawm nan tiin, an ram flag-te vaiin khawlai an fang zui a ni. Kar hnih chuang zet nawrh huaihawt a nih avang hian, bank leh zirnainte chu khar a ni a, sumdawnna lam pawh a khaihlak nasa hle.

October 17 khan Lebanon sorkar chuan WhatsApp call-ah chhiah lak a nih tur thu hi a puang a, hemi duhlohna aṭang hian mipuite chu sorkar laka lungawi lohna hi an lan tir ṭan a ni. "Inremna kan siam theih tak loh vangin, kan buaina tawh mek chinfelna turin Lebanese mite duhdan chu ka tihhlawhtlinsak ta e," tiin Hariri chuan a ban chhan chung­changah thuchhuah a siam.