Electric Veng hnehin Aizawl FC an sang zel

Mizoram Premier League Season 8-a hneh loh la tawng lo Aizawl FC chuan nimin khan hun tawp dawnah goal hnih khungin Electric Veng FC 2-0 in an hneh a, I League club hian point 18 hmuin hmahruaitu an ni.

Lammual inkhel hmuhnawm takah Isak Vanlalruatfela'n minute 86-naah mawi zetin box pawn aṭangin a hlai lut a, goal pawimawh bik khungtu Thingsulthliah tlangval hi man of the match-a thlan a ni a. Injury time-ah AFC tan F. Lalremsanga'n a khung belh.

Standly Rozario-a'n Aizawl FC chu team ṭha zawkah a siam chho a, round 8-ah meuh chuan tlarhnung a phui ṭhat bakah an goal nawr a na bawk. Electric Veng FC nen pawh hian I League club-in goal chance an nei ṭha a, Remsanga ball pet ṭha tak keeper Lalneihsanga'n a dan hnua Rochharzela'n a hlah chu a uiawm zual a ni.

Chutihrualin Electric Vengin goal venhim tumin a venhim lam an uluk a, team pahnih hi tun season-a vawi hnih goal awm loa an inhnehtawk tih hre tan phei chuan goal awm lo bawka an inhnehtawk a rinawm hman hle.

Lalsangzuala Hmar hote pawh hian goal khung theihna tur hun ṭha a nei a, Jacob Lalrawngbawla freekick pet ṭha zet chu K. Lalmalsawma'n (Buang-puia) hnai tak aṭangin goal zawnah a tauh lo.

A tawpah erawh Isak chu danglamna thlentu a ni a, Aizawl FC winger hian mawi zetin box pawn aṭangin a pet lut. Thingsulthliah tlangval hian goal a khung hma hian ṭum hnih goal ban a pet per tawh a, vawi tam Electric Veng tlarhnung a tibuai bawk.

Goal luh hnuah Electric Veng ṭang tur an awm tawh lo a, ding lam aṭanga Rochhara cross Remsanga'n goal-ah chantirin Aizawl FC 2-0 in an chak.

Electric Veng coach Lalsangzuala Hmar chuan, "Ni thum chhung uluk taka training kan neih chu a hlawhchham. Starting eleven tura kan tel vek tawh zingah khel thei lo an awm a, a pawi takzet. Aizawl FC hi an ṭha a, hneh theih loh erawh an ni lo, kan rilru put hmang kan thlak a ngai," tiin inkhelh banah a sawi.

Aizawl FC coach Standly Rosario chuan, "Kan khelh danah ka lawm. Chance ṭhahnem tak kan nei a, goal kan khung har mai chauh a ni. Khelh tur kan la ngah avangin knockout stage chungchang sawi a la rem lo a, hmasawn zel tura theihtawp chhuah kan mamawh," tiin a sawi ve bawk.