Chawnpui par thliaktu Ramhlun North
Mizoram Premier League Season 8 match pawimawh bikah Ramhlun North-in an elpui Chawnpui chu Thawhlehni zan khan 2-1 in an hneh a, table mawngphah chhuahsanin pasarihnaah an awm.
Lammual inkhel nung ṭha takah Chawnpui FC-in Lalnunmawia hmangin khung hmasa mah se Ramhlun North-in Lalpekhlua Jongte leh M. Lalrintluanga te hmangin an chhanglet. MPL8-ah Ramhlun North-in point ruk an hmu tawh a, Chawnpui lak aṭanga an hlawhchhuah vek a ni.
Par chhung rei lo
Chawnpui FC-in Kolasib zin hnua MPL match hmasa berah Chhinga Veng 3-2 in an hneh thei a, hemi hmaa Chanmari an hmachhawn ṭumin hun tawp lamah goal hnih an khung bawk avangin an par an chhuah ṭanah a ngaih theih.
Ramhlun North nen pawh Chawnpui FC-in bul an ṭan ṭha a, Vanlalthlamuana cross chu minute ngana lekah captain Mawitea'n goal-ah a chantir a, 1-0 a ni nghal. Mahse Ramhlun North-in minute khat lekah a chhanletna an hmu nghal a, Chawnpui par thliahin a awm zui bawk.
RNFC an tlo
Chawnpui tlarhmaah Mawitea, Thlamuana leh T. Lalnunpuia (Bawihpuia) te an awm avangin an lang hraw a, hming langsar tlemna Ramhlun North hmuh len an har. Amaherawhchu football chu team inelna a ni tih a lang a, Chawnpui lakah coach Jonathan C. Lalrintluanga (Thantea) hote team ṭha zawk an ni.
Ramhlun North chhanletna goal hi midfielder Lalpekhlua Jongte chip luh a ni a, goal chance ṭha pawh an ngah zui hle. First half-ah Lalnunzira Hnamte leh Lalthankhuma ten chance ṭha an hlah a, second half-ah Lallawmzuala cross chu captain Jessy Vanlalmuana'n goal-ah a chantir thei lo.
Minute 67-naah M. Lalrintluanga rawn lutin Lunglei tlangval hi danglamna thlentu a ni. Injury time-ah Rintluanga hian Zira ball pek chu goal-ah a chantir a, Chawnpui tan sutna hun a awm tawh lo.
Engtin zel?
Ramhlun North hian table mawngphah chhuahsan mah se Chawnpui nen an inthlauhna hi point hnih chauh a ni a, phase 1 ang thoa club dang panga lak aṭanga point an hmuh theih loh chuan an dinhmun hi a la him lo.
Chawnpui tan inham tang tur pawhin hmabak a harsa dawn a, goal 19 zet an chhuah tawh avangin tlarhnung aṭanga an inthuam ṭhat a ṭul ang.