Barty hnehtu Bertens

Kiki Bertens chuan chawpchilh taka WTA Finals khelh tura koh chawp a nihna chu result ṭha hmangin a chhang let a, a match hmasa berah world number 1 Ashleigh Barty a hneh.

Naomi Osaka inhnuhdawh vangin Bertens hi a inlan leh hnuhnawh. Shenzhen khawpuiah Bertens a mikhual bik lo, Australian nula Barty hi darkar hnih leh minute riat chhungin 3-6, 6-3, 6-4 in a hneh. Barty-i'n a group match hmasa zawkah hnehna a chan tawh avangin tun ṭumah hian chak se chuan semifinal a lut thei. Mahse, a tlawm avangin a match hnuhnung bera Petra Kvitova hneh ngei a ngai dawn a ni.

Kum 27 mi  Bertens chuan, "Season kal laia tournament hnuhnung berah beisei loh tak maiin ka inlan ve leh thut a ni a, kei chuan ka theihna zawng zawng ka hlan ang. "Match tir lamah kha chuan ka khel ṭha lo, mahse a rei hnu kha chuan ka khel ṭha tial tial a, boruak nuam tak hnuaiah hnehna ka chang thei hram," tiin a sawi.

Inkhel dangah Belinda Bencic chuan semifinal a beiseina chhi nung turin Kvitova chu 6-1, 3-6, 6-4 in a hneh. Swiss nula Bencic-i'n hnehna a chan ve leh tak avang hian Red Group-a player pali awm chu knockout lut thei vek an la ni.