Carabao Cup champion lai City chak
Manchester City chuan Thawhlehni zan khan Carabao Cup-ah Southampton chu harsatna nei loin 3-1 in an hneh a, quarterfinal an lut.
Pep Guardiola hote tan hian Nicolas Otamendi-a'n goal hmahruai khungin Sergio Aguero-a'n goal hnih a khung belh. Saints goal awmchhun hi City-in goal thum an khung hnuah Jack Stephens-a'n a khung a ni.
An va ṭha em!
Man City-in kartawpa Aston Villa hnehtute aṭangin player pakua zet an thlak chungin Gabriel Jesus leh Aguero te tlarhmaah an inkawp thei a. Tlarhnungah pawh Barcelona rinrawl ṭhin Claudio Bravo-a'n goal a veng thei a, Argentine defender Otamendi-a'n defender a ho thei bawk.
Midfield-ah Bernardo Silva chu a khaipa ber a ni a, Phil Foden leh kum 18 mi Tommy Doyle te nen ball an inpe kual. Hming langsar lo ber Doyle hi Manchester-a piang leh City ṭantu dik tak a nih bakah club legend Mike Doyle leh Glyn Pardoe te tupa a ni.
Kum 71 mi Glyn Pardoe hi centre forward-a khel ṭhin, full back-a inlet ta a ni. City tan vawi 380 zet khelin kum 1970 khan George Best a tackle-naah a ke a ti tliak. Mike Doyle hi kum 64 mi niin 2011 khan a thi a, kum 1976-a City-in League Cup an champion ṭuma captain a ni thung.
City hian inkhel an thunun bawk a, hun engemaw tichhung chu 89% zet ball possession te an nei hial a, hun tawpah pawh 77% an la nei pha. Leicester City laka mualpho hlim Saints hna ber chu goal chhuah tam lo tura goal ven a ni ber.
Inelna pawimawh
Manchester City boss Pep Guardiola chuan, "Inelna kan la thutak a, ball kan in pass satliah lo. Kan khingpuite lamah ball kan inpe thei a, a bik takin kan winger-te an che ṭha hle. Hun tawp lam chhiar tel lohin kan khelh dan a lungawi thlak viauin ka hria," tiin inelna an ngaih pawimawh thu a sawi.
Southampton manager Ralph Hasenhuttl chuan, "First half kan khelh dan kha inkhelh dan tur hmang a ni lo. Amaherawhchu kan match hnuhnung bera kan result aṭang chuan inhriatthiam ka ring. Goal kua zeta chak loh hnua khawvela team ṭha ber khelmuala lenluh hi a awlsam lo a ni," tiin an khelh dan hmang a sawifiah bakah an khingpui Man City a fak.