Champion lai AFC hmaah Kanan FC

Vawiin chawhnu dar 1:00 hian Lammualah NECS ADFA I Division League hmawr bawkna neih a ni dawn a, league round khelh zawh taka team ṭha pahnih Aizawl FC Academy leh Kanan FC ten nomawi an inchuh ang.

Season hmasa khan team pahnih hi final-ah bawk an inhmachhawn tawh a, AFC Academy hian 3-1 a hnehna changin nomawi an chawi. Kumin MFA Cup-ah AFC hi an champion zui leh bawk a, inrintawkna an nei sang hle.

Aizawl FC Academy enkawltu Malsawmkima chuan, "Kan naute an inringtawk a, league round khelh tawhah pawh kan khel ṭha. Kanan hneh chunga nomawi humhim kan tum," tiin Vanglaini a hrilh.

League round-ah AFC hian hneh loh pahnih chiah an nei, final-a an hmachhawn tur Kanan FC leh MAP Academy an ngam lo, hneh loh tawh hneh let chunga chak an tum dawn a ni. Nikum lama an hlawhtlinpui tawh player tam zawk chu senior team-ah an kaisang tawh a, kuminah hian captain leh defender rinrawl ni bawk Sanga bakah Zoliantluanga leh Laltlanhlua te an la kawl a, anni pathum tawnhriat hi a pawimawh dawn.

Inelna neih ṭan tir lamah Kanan FC inkhelin duhthu a sam tawk lo a, tualchhung coach tawnhriat ngah Chawngthansanga hote hi a rei hnuah an khel ṭha tial tial a, tunah chuan nikuma an ngam loh AFC Academy pawh an hlau tawh bik lo.

Kanan hian semifinal-ah team ṭha FC Bethlehem chu Joseph Lalvenhima goal hnih hmangin 2-1 in an hneh thei, league round lama AFC an hneh ṭum pawh khan Joseph-a hian goal awmchhun a khung tawh, tun inelna bika goal ruk khung tawh forward hi ven ngun ngai bik a ni ang.

Coach Chawnga naute hian champion an duh a nih chuan tlarhma lamah Joseph-a an hman thiam a ngaih bakah tlarhnung rem phui a ngai dawn, an hmachhawn tur hi tun inelna a goal khung hnem ber (24 goals) an ni.