Medvedev leh champion lai an tla

Rolex Paris Masters khelh laiah beisei loh result langsar kan hmu nghal. Tun hnaia khel ṭha tluang tak Daniil Medvedev leh champion lai Karen Khachanov te chu hneh nei loin an match hmasa berah an chak lo.

Thawhlehni zan Bercy Arena-a inkhelah world number 4 Medvedev hi Jeremy Chardy lakah 4-6, 6-2, 6-4 in a chak lo. Russian tlangval hian set khatna la thei mah se a hnuhnung pahnihah tihsual a ngah a, a service vawi hnih a hloh zui avangin a chak lo zawkah a ṭang.

Cincinnati leh Shanghai Masters champion Medvedev chuan, "Tunah chuan ATP Finals atan ka inbuatsaih chhunzawm nghal ang. Tunah beisei phak lo mah ila O2 Arena-a inelna hi ka vawi khat khelhna tur a nih dawn avangin ka phurna a la tlahniam chuang lo," a ti.

Tun hnaiah chuan Medvedev hi player beiseiawm berte zinga mi a ni a, kuminah season hmasa lama Alexander Zverev tih angin ATP Tour Finals champion nih a tum dawn a ni. Inkhel dangah champion lai Khachanov chu German tlangval Jan-Lennard Struff lakah 7-6(5), 3-6, 7-5 in a chak lo. Season hmasa khan Khachanov hian nomawi chawi turin ranking sang 10 zinga pali a hneh thei a, an zingah Novak Djokovic pawh a tel - kuminah erawh beisei a phak lo hle.

World number 36 Struff hian Jo-Wilfried Tsonga leh Matteo Berrettini te inkhela chak zawk a hmachhawn leh dawn a, Medvedev hnehtu Chardy pawhin seeded 15-na John Isner emaw Cristian Garin zawk a hmachhawn leh ang.