Messi ropuina Barca tan mawina

Barcelona chak leh Lionel Messi goal khung ziahzawm ngaiah neih ṭan a ngai leh ta a, Thawhlehni zan khan Catalan club hian Real Valladolid chu 5-1 in an sawp. 

Messi-a'n goal hnih a khung a, assist vawi hnih a nei bawk! Clement Lenglet, Arturo Vidal leh Luis Suarez ten goal khat ṭheuh an khung bawk a, mikhual team tana Kiko goal khungin awmzia a nei lo. Valladolid attacking midfielder Michel chuan, "A ke aṭang hian magic ropui tak a chhuak ṭhin a ni ber a, chu chu ropui ti taka lo en mai hi kan tih theih chu a ni," tiin a sawi. 

Barcelona-in hnehna an chan leh tak avangin table chung ber an luah leh ta a, khualmuala Alaves nena 1-1 a inhnehtawk Atletico Madrid chu pathumnaah an awm thung. 

Inkhel ṭan aṭanga minute hnihna lekah Barcelona-in goal hmahruai an khung a, Catalan club defender Lenglet chuan an goal hmasa ber hi a khung. Mahse, Nou Camp-ah Valladolid-in tlawm an tum bik lo. Kum 31 mi defender Kiko hian minute 15-naah an si phurh a rawn sut a, Barca fans a ngawihtir. 

Mahse, Valladolid-in hriat loh an nei a, an goal khung hi Messi 'magic' kaihthawhna hmanrua mai a ni. Minute 29-naah Vidal chuan a khung ve leh a, Messi siamsak a ni. Minute nga a liam a, Messi bawk kan hmu - freekick ropui hmangin an goal thumna a khung a, a career-a freekick hmanga goal 50-a khungna a ni nghal. 

Khawvelin a mit tih tlai nan 'ennawm' hmuh a duh ṭhin a, chu ennawm siam tum chuan hman aṭangin khawvel hi a phi tawh ṭhin. Messi-a'n second half-ah khawvel tuihalna a hnem chhunzawm a, minute 75-naah Ivan Rakitic hnen aṭanga a ball hmuh chu 'one touch' hmanga mawi zeta control-in goal-ah a chantir. 

Barca fan-ten Messi an neih vanga an vanneihzia an inhre nawn a, khawvelin ennawm an hmu a, Valladolid player-te chu Messi thiamzia en hnai berah an ṭang a ni ringawt! Messi hian a la duhtawk lo cheu. Minute 77-naah ṭha zetin Suarez tan a siamsak leh a, a ṭhianpa hian a ti thlawn lo - goal a khung a, 5-1 in Barcelona an chak. 

Barcelona captain-in goal hnih a khung leh tak avangin club football-a goal khung tam lamah a elpui ber Cristiano Ronaldo a khum leh ta a, goal 608 a khung tawh. Messi hian heti zat club football-a goal khung tur hian match 695 a khel a, goal 606 khungtu Ronaldo-a'n match 814 a mamawh thung - Messi hian match 119-in a khel tlem zawk tihna a ni. 

Argentine forward hian 2016-17 season hnuah direct freekick hmangin goal 16 a khung tawh a, hetih chhunga Europe top five league-a amah hnaih bertu aiin goal 10-in a khung tam! Spain aṭanga inlakhran tum Catalonia boruak tun hnaiah a sang thar a, fan-ten 'Zalenna' tih banner lian tak an pho chhuak - khelmuala zalen taka Messi che vel an hmu thung. 

Barcelona inlan hmain Atletico Madrid an inkhel a, mahse season hmang ṭha lo Diego Simeone naute an insiamṭha thei lo. 

Atletico hian league match thum a zawna hnehna an chan loh hnuin kartawp inkhelah khan Athletic Bilbao chu 2-0 in an hneh a, an phur thar. Mahse, Madrid khaw club hi an insiamṭha tak tak hman lo. Alaves khelmualah chak beisei takin an lenglut a, Alvaro Morata chuan a match hnuhnung pathuma a goal thumna ni turin minute 70-naah a khung. 

Mahse, Alaves an beidawng lo. West Ham forward hlui Lucas Perez chuan minute 83-naah si phurh a rawn sut a, point insemin team pahnih an ṭin.