Bangladesh captain Al Hasan an hrem

Cricket khawvelin chanchin lawmawm lo a hre leh ta a, Bangladesh test captain Shakib Al Hasan chu thamna chungchang avangin kum hnih chhung atan hrem a ni. 

Kum 32 mi cricketer hian thamna sum hi la chiah lo mah se thamna sum la tura thlem a nih chungchang hi thuneitu sangah thlen loin a ngawih bo pui a, hei hi  International Cricket Council (ICC) chuan a hrethiam lo. 

Mahse, kum hnih hrem a nih chhunga kum khat zawk hi 'suspend' a ni rih a, October 29, 2020-ah chuan cricket khel turin a lo kir leh thei dawn tihna a ni. ODI all-rounder ranking-a no.1 dinhmun luah lai Al Hasan hian Bangladesh tan format hrang hrangah match 338 a khel tling a, 2019 Cricket World Cup-ah khan run siam hnem pathumna niin match hnih chu century a siam. 

Shakib chuan, "Hun kha leh chen ka lama ṭang ṭhin Bangladesh Cricket Board, sorkar, journalist leh fan-te chuan ka hun tawn hlimawm leh harsa lai berah pawh min thlawp zel ka beisei tlat a ni. "Nangni ṭawiawmna nen chuan cricket khawvelah ka lo kir leh thuai ang tih ka ring tlat a, ka tih tur tiin rinawm takin ka awm tawh ang," a ti a, amah duhsaktute chu thlawp chhunzawm turin a sawm.  

Shakib hi January 2018-a Sri Lanka leh Zimbabwe te nen tri-series an khelh ṭumin thamna sum la tur hian thlem a ni a, hemi kum Indian Premier League-ah hian an thlem leh bawk. Thamna sum a la lo chungin he thil thleng hi a ngawih bo pui a, hrem a tawrh phah ta a ni. Hetihlai hian Bangladesh Cricket Board leh prime minister Sheikh Hasina te chuan Shakib Al Hasan hi a hun tawn harsaah an thlawp tlat thu an sawi.