Inter leh Lukaku an kal zel

Antonio Conte kaihhruaina hnuaiah Inter Milan leh Romelu Lukaku te chu hmalam panin an kal zel. Thawhlehni zan Serie A inkhelah Inter hian Brescia chu 2-1 a luhchhuahin table hmahruaitu an ni rih.

Inter hian match 10 khelh tawhah point 25 hmuin a chung berah an awm, an mahni aia match khata khel tlem zawk Juventus aiin point hnihin an sang zawk. Nizan khan Juve an inlan a, hnehna an chang a nih chuan league hmahruaitu hi an inthlak ang.

Stadio Mario Rigamonti-a inkhelah Inter an chungnung nghal, Romelu Lukaku leh Diego Godin ten a tir lamah goal khung theihna hun nei mah se goal kham chungah an tauh chhuak thung.

Minute 23-naah tun hnaia khel ṭha tak Lautaro Martinez chuan yard 25-a hla aṭangin goal hmahruai a khung a, tun hnai league match thuma a goal ngana ni turin Lukaku chuan minute 63-naah an goal hnihna a khung bawk. Mualneitu Brescia tan tlarhma lamah Mario Balotelli a hmuhnawm a, Manchester City striker hlui hian an si phurh sut theihna hun nei mah se goal zawnah a pet lo - a vannei tawk lo bawk a ni.

A naute khelh danah Conte a lawm a, tun hnaia match an ngah viau chunga result ṭha an hlawh chhuak ṭhin chu lawmawm a tih thu Italian manager hian a sawi.

Inter Milan manager Conte chuan, "A chung berah kan awm, hetiang thleng tur hian kan theihna zawng zawng kan hmang. Season tawpa hlim ber ni tur erawh chuan tun aia nasa lehzual zawka ṭan mar a ngai dawn," a ti.

Nerazzurri hian 1966-67, 1997-98 leh 2012-13 te khan season tir lamah khualmuala an match hmasa pangaah hnehna an chang a, an record ṭha tak hi kuminah an rawn nih rual leh chiah. Inrinni zan hian Bologna mualah an lenglut dawn, hnehna an chang a nih chuan club record thar a ni ang.