Spurs khelmualah Harh thar mamawh Liverpool

Zanin dar 1:30-ah Premier League match inkhel hmuhnawm en tur a awm dawn a, Tottenham Hotspur chuan anmahni ang thoa champion beisei Liverpool an mikhual dawn.

Liverpool hian league table-ah pangana dinhmun an luah mek a, hmahruaitu Manchester City chu khelh zat inangah point sarihin an thlau mek - City bakah Manchester United leh Leicester City an 'form' tel bawk si avangin Reds tan league-a harsa a, kawng dik zawh ṭan leh turin Spurs hneh hmasak hi an tan tih makmawh a ni.

Tottenham-in table-ah parukna dinhmun luahin Reds an phak lohna hi point khat chauh a ni a, match khatin an khel tlem bawk - Liverpool hi an chak loh chuan parukna an ni daih thei tihna a ni a, nizana Everton leh Leicester City inkhel result a zirin pasarihnaah pawh an tla thla daih thei ang!

Liverpool tan an champion nomawi humhim turin zaninah chak a ṭul a, Spurs tan tlawm a thiang bik lo - zanina English club lian pahnih intawng tur hi a hmuhnawm loh ring suh. 

Liverpool-in December 19-a 7-0 ngawta Crystal Palace an sawp khan Reds fan-ten season hmasaa an team kha an lo kir leh taah an ngai a, an hmaah chhum zing chhah takin a lo hmuak tih reng an hre lo. 

Palace an sawp hnuah Reds hian inelna hrang hrangah match sarih an khel leh tawh a, vawi khat chiah chak an nei - an chak awmchhun hi FA Cup third round-a 4-1 a Aston Villa an sawp kha a ni. Hemi ṭum hian Covid-19 vangin Villa hian an academy player rual an luhtir!

Premier League bikah phei chuan Reds hian Palace hnuah league match nga an khel a, vawi thum draw result neiin vawi hnih an tlawm a, goal khat chiah an khung - champion tum tan chuan inenfiahna tham a ni. 

Reds hian an match hnuhnung berah FA Cup fourth round khelin an hmelma kumhlun Manchester United an hmachhawn a, 3-2 in an tlawm - Liverpool tan lawmna tur erawh a awm a, chu chu goal an khung leh ta kha a ni. Goal khung khawl Mohamed Salah-a'n goal hnih a khung a, zaninah khung chhunzawm a tum ang. 

United-in FA Cup aṭangin Reds an hnawt chhuak a, a êng zawnga he tlawmna hi an thlir duh ṭalh a nih chuan inelna hmachhawn tur an neih tlem sawt avangin Liverpool-in match an nei tlem dawn tihna a ni a, hliam an neih reng bawk si avangin FA Cup aṭanga tlak hi league champion nawn tum tan chuan chanchin ṭha a ni daih thei. 

Reds manager Jurgen Klopp chuan United laka an tlawm hlim hian, "Kawng dik lam kan pan tih ka hria," tiin a naute an insiamṭhat thu a sawi a, chak lohna karah pawh lawmna tur a hmu. Kop tam takin German coach thusawi hi an ṭawm ang. United lakah Liverpool hi an tlawm ngei a, mahse, kumina an match hmasate ngaihtuah chuan insiamṭha tawh tak an ni. 

Chutihrual chuan season ṭantira United nen huang khata dah thiang lo khawpa an ngaih team ṭha fal khan Red Devils an hneh lohna aṭangin lawmna tur an hmu ta 'mai mai' a, hei hian tun hnaia Liverpool dinhmun dik tak 

a hrilhfiah. 

Jose Mourinho enkawl Spurs-in December khan league match nga an khel a, vawi khat chiah an chak - an hneh awmchhun hi Arsenal (2-0) an ni a, Crystal Palace (1-1) leh Wolverhampton Wanderers (1-1) inhnehtawkpuiin Liverpool (2-1) leh Leicester City (2-0) an ngam lo. 

Mahse, London club hian January 2-ah 3-0 a Leeds United sawpin bul an ṭan a, Fulham (1-1) inhnehtawkpui leh zauh mah se 3-1 in Sheffield United an hneh zui. Hetih chhung hian FA Cup-ah Marine (5-0) leh Wycombe Wan-derers (4-1) sawpin goal khung an uar viau bawk.

London club hi bench lama Gareth Bale dah ṭha thei, tlarhmaa Son Heung-min leh Harry Kane inkawptir thei an nih avangin goal khung lamah chuan an ngaihtuahawm loh hle - mahse, Spurs hian Liverpool hi an ngam lo tlat ṭhin. 

March 10, 2013 aṭang khan Spurs hian league match 16-ah Liverpool hi vawi khat chiah an la hneh ve a, vawi li an draw a, Reds hi vawi 11 an chak! 'The Special One' tih ngata hminglem inpe ngam Mourinho hoin he record duhawm lo hi thaichhiat an tum ang.

Liverpool tan an match hnuhnung pahnihah hliam vangin captain Jordan Henderson a inlan thei lo a, khawthlang media-te thuziak rin tur a nih chuan zaninah a inlan theih tawh a beiseiawm thung. Tlarhnungah Joel Matip-a'n ngai a awh leh tawh avangin midfielder Fabinho nen inkawp tura ngaih an ni a, tlarhmaah Mohamed Salah, Sadio Mane leh Roberto Firmino-ten an theihna ang tak taka an khel a nih chuan Spurs tan manganna tur a ni ang. 

Spurs-in hliam vangin Giovani Lo Celso an chhawr thei dawn lo chiang a, he thu buatsaih thleng hian dam lohna avangin Serge Aurier dinhmun a la chiang lo bawk. Matt Doherty chu dinhmun chiang lo zingah a tel a, Doherty buaina hi he thu buatsaih thleng hian a chhan sawi chian a la awm lo.