MFA-in inelna buatsaih dawn lo

Mizoram Football Association (MFA) chuan nimin khan Sairang Dinthar Venga an khelmual kiangah Special General Body Meeting an hmang a, '2020-21 season hmabak kal zel dan tur leh Covid-19 in football a nghawng nasat avanga insiamrem ngaite' tih chu ngaihtuahho a ni. Footballer leh football buaipuitute himna ngaih pawimawh avangin 2020-21 season-ah inelna buatsaih lo turin thutlukna an siam.

MFA chuan, "Football hruaitute ṭhukhawm chuan tun season atana calendar kalpui zel dan tur an ngaihtuah a, Covid-19 hripui lêng mêk avangin footballer leh football buaipuitute himna ngaih pawimawh ni se ṭha an ti a, hei vang hian Mizoram pum huap inelna MFA Cup bakah District Foot-ball Association hrang hrang inelna Inter District Junior leh Sub-Junior competition-te buatsaih loh law law ni mai se tiin lungrual takin an rel," tiin thuchhuah an siam.

Coronavirus avangin MFA chuan 2020-21 season-ah Mizoram Premier League a awm loh tur thu hi an puang tawh a, tunah MFA Cup bakah District Football Asso-ciation hnuaia inelnate an buatsaih loh tur thu an tichiang leh bawk. Hetihlai hian District FA tinte chu anmahni district chhung ṭheuha football kalpui dan chungchangah district thuneitute phalna hnuaia inelna buatsaih kawnga thuneihna pek an ni. 

MFA hian Sairang Dintharah hian FIFA leh sorkar ṭanpuinain artificial grass ṭha tak an nei dawn a, tunah hian peih fel a ni ṭep. MFA president Lal Thanzara chuan district hrang hranga Football Association hruaitute leh Zone hruaitute nena an thawhhona rahchhuah, MFA khelmual kianga an inhmukhawm thei chu lawmawm a tih thu a sawi a. MFA-in FIFA leh sorkar ṭanpuinaa artificial grass ṭha tak awmna khelmual a din thei tur chu lawmawm a tih thu a sawi a, Mizoram football tán chanchin lawmawm tak a nih thu a sawi. 

Hri leng avanga 2019-2020 hun rei tak chhung leh, 2020-2021 season hun ṭhate football lama hmalakna a awm theih loh avangin Zone FA, District FA leh MFA term hman mêk chu kum khat ṭheuh atan pawh seisak an ni. Special General Body Meeting-ah hian MFA Executive Member a nihlaia August 7, 2020-a boral ta Dr. Lalzarmawia Khiangte sunna hun an hmang bawk.