Auba tel loin Arsenal an chak

Arsenal chuan an captain Pierre-Emerick Aubameyang tel loin FA Cup-a an hneh loh Southampton chu 3-1 in an hneh let. Mikel Arteta naute hian Premier League match an khelh hnuhnung parukah chak loh an nei lo, vawi nga hnehna an chang!

Gunners tan Nicolas Pepe, Bukayo Saka leh Alexandre Lacazette ten goal khat ṭheuh an khung. Saints tana Stuart Armstrong goal hmahruai khung chu mikhual team chhaih kawlhtu mai a chang zo ta a ni.

Thawhlehni zan khan St Mary’s Stadium-ah ruah a sur a, khaw vawt ti zual turin thli a thaw bawk. Boruak vawt vin tak hian Arsenal kaltluang a chelh ding zo chuang lo - FA Cup lama hnehna changtu Southampton tan tih theih a awm lo.

A tir aṭangin inkhel a nung nghal, striker Lacazette-a'n a hun ṭha neih hmasa ber erawh a chhawr thei lo, keeper Alex McCarthy nen chauh an inhmachhawn hnuah a hlah - McCarthy hian a kein a lo dansak. Minute thumna lekah Southampton lamin corner an hmu zui a, captain James Ward-Prowse ball pet chu laklawh nei maih loin Armstrong-a'n a hlap lut - keeper Bernd Leno tan tih theih a awm lo. Arteta naute an chak lohna ngaiah an tlawm nawn leh dawn niin a lang hman.

Pound maktaduai 72 man Pepe-a'n Granit Xhaka hnen aṭanga a ball hmuh chu box chhungah na taka hauh chungin si phurh sut nan a hmang, minute riatna lekah team pahnihin goal khat ve ve an nei der tawh.

Chawlhlawk hma deuhin Saka a inlar. Lacazette-a through ball lak tumin keeper McCarthy a rawn tlan chhuak - England international Saka chuan ball hi lo lak khalh hmain box pawn aṭangin an hmahruaina goal a khung.

Season duhawm hmangtu Saka-a'n minute 72-naah Lacazette tan a siamsak zui leh a, ball chang tlem zawk mah se Gunners lamin an mamawh tawk goal an nei a, khualmual aṭangin point thum hlu tak an hlawh chhuak.

Tun hnai Arsenal match hnuhnung pahnihah Aubameyang a inlan ve lo. Gabon international tel theih loh chhan hi 'chhungkaw thil' tih bak sawi chian a ni lo a, inkhel thei loa a awm a nih chuan mimal harsatna lian tak a tawk tih chu a chiang.

Gunners manager Arteta chuan, "Auba-a'n hun harsa tak a hmang mek, a hun tawn mekah hian keini chuan kan thlawp tlat - hnehna kan chan hi a tan kan hlan," a ti. Lacazette pawhin a goal khung chu Aubameyang tan a hlan.

North London club hian Inrinni zan hian Emirates Stadium-ah Manchester United an hmachhawn zui dawn. Ole Gunnar Solskaer naute hi champion tum lai an nih avangin inkhel hmuhnawm a ni ang.

Season duhawm takin ṭan mah se tun hnai an legaue match hnuhnung pasarihah Southampton hian vawi khat chiah hnehna an chang, point 29 hmuin table-ah 11-na dinhmun an luah - season tir lam nen chuan an boruak a danglam ta.

Saints-in Arsenal lakah goal khung hma viau mah se an tlarhnung a buai zui. Hrem vanga chawl Ryan Bertrand leh inhliam Kyle Walker-Peters te awm loh a lang viau, hmalam pan tur chuan an tlarhnung an saim rem ran a ngai ang.

Saints manager Ralph Hasenhuttl chuan, "Team ṭha tak kan ni a, chutih rualin Arsenal hneh turin kan khel ṭha tawk lo. Tun hnaiah tlahniam mah ila point 29 kan la nei hi a lawmawm," a ti. Inrinni zanah Aston Villa an mikhual zui lehnghal dawn a ni.