West Brom tan Man City an thiam mah mah

Manchester City chuan Premier League hmahruaitu ni turin Thawhlehni zan khan West Brom 5-0 in an sawp. The Hawthorns-a inkhelah Ilkay Gundogan-a'n goal hnih a khung a; Joao Cancelo, Riyad Mahrez leh Raheem Sterling ten goal khat ṭheuh an khung bawk.

Pep Guardiola hote hian match 19 khelh zawhah point 41 an hmu a, an hmelma Manchester United aiin khelh zat inangah point khatin an hmu sang zawk. Amaherawhchu nizan khan Man United-in Sheffield United an hmachhawn a, Ole Gunnar Solskjaer-a hoten point thum an hlawh chhuak a nih chuan pakhatnaah an kir leh ang.

Pep Guardiola-a'n Baggies a hmachhawn hmain a elpui tur manager Sam Allardyce-a fin thu a sawi a, khelmualah erawh Spanish manager thluak ṭhatzia hmuhin a awm thung. Man City hian an player pawimawh Kevin de Bruyne leh Sergio Aguero te an chhawr thei lo chungin harsatna an nei lo.

City squad-a forward dam ṭha awmchhun Gabriel Jesus chu bench-ah dah a ni a, hma tawngah Phil Foden, Riyad Mahrez, Raheem Sterling, Ilkay Gundogan leh Bernardo Silva te an awm a; tlarhma leh tlarhnung thlunzawm turin Rodri a awm. Pep-a naute an inringtawk leh tawh a, a bu ang thlapin an khel chhuak leh tawh. An khelh dan thlirin Man City hi hliam leh Covid-19 in a tibuai ve lo emaw tih mai tur a ni a, amaherawhchu Pep-a hote aia inhliam nasa an awm chuang lo.

Tun season-ah striker rinrawl Aguero leh champion ṭuma defender rinrawl Aymeric Laporte te an la chhawr mumal lo. Player ṭangkai hming tu pawh lam ila, inhliam vanga match hnih khat awl vek tawh an ni a. Pep-a'n inhliam hi chhuanlama hmang loin a sut kian dan tur a ngaihtuah zawk.

West Brom-in Etihad Stadium-ah point khat an hlawh chhuak a, Hawthorns-ah manager thar Big Sam-a hoin beiseina an nei sang hle. Baggies-in na takin Man City tlarhnung ṭhawng nghal mah se Pep-a hoten rang takin an beng dai a, a aia nain an nawr let. 

Keeper Sam Johnsone-a'n Phil Foden goal khung tur chu a dang hram a, Etihad Stadium-ah Manchester United keeper hlui hi a chet ṭhat tawh avangin City ṭantute tan hlauhthawnna tham a tling. Amaherawhchu minute rukna lekah Joao Cancelo ball vawrhluh chu tun hnaia che ṭha Gundogan-a'n mawi zetin a la thla a, German midfielder hian fing zetin goal kilah a pet lut.

Minute 20-naah goal hmahruai siamtu chu a khungtu a ni thung a, Portuguese right back hian box pawn aṭangin cool takin a hlai lut. Assistant referee-in offside flag a phar a, amaherawhchu VAR hmanga en let  hnuah goal-ah pawm a ni.

Baggies tlarhnung tih ṭhat tawk loh chu Gundogan-a'n remchangah lain defender Dara O'Shea-a'n a veng chungin awlsam hmel takin a ke vei lamin minute 30-naah a khung. Team ṭha zawkin goal thum an khung tawh avangin chak tur a chiang tawh a, injury time-ah Riyad Mahrez-a'n a ke vei lamin a rawn khung ve bawk.

City captain Raheem Sterling-a'n ṭum dang a pha lo a, player ṭha erawh chelh reng theih a ni lo. Sterling hian minute 57-naah Mahrez-a pass chu awlsam takin a khung a, chance awm theihna tura Rodri ball pek a fing hle. Spanish midfielder hian midfield a thunun a, kawh zetin crossbar a pet per bawk.

Man City hian KDB, Aguero leh Jesus tel loin goal nga an khung a, Brazilian forward Jesus hi bench aṭanga rawn lutin goal dang erawh a luh belh tawh lo.

Man City-in Cancelo lalut turin Juventus hnenah Danilo an pek bakah pound maktaduai 27.4 an pe a, a man hi pound maktaduai 60 anga chhut a ni. Portuguese right back hi khawvela right back manto ber a ni a, season khatnaah erawh a talbuai hle. Kuminah erawh hliam vangin season bul ṭan lo mah se a theihna tak tak hmuhin a awm ta.

Kum 26 mi defender Cancelo hi midfielder ang maiin a mit a fing a, ball pet a thiam bawk. Gundogan goal khung tura a ball pek leh a goal khungin Cancelo thiamzia a sawifiah. Chutihrualin De Bruyne awm loh lang miah lo turin Gundogan-a'n a ai a awh zo. Germany international midfielder hian tun season league match 14 a khelh aṭangin goal sarih a khung a, league match hnuhnung pathumah goal li a khung.

Man City boss Pep Guardiola chuan, "Match 19 khelh tur a la awm a, hmabak thui tak zawh tur a la awm. Chak loh hun kan la nei dawn a, point kan la hloh ang. Chumi hunah chuan kan talbuai loh a ṭul a ni. Table kan thlir a la a hun lo," tiin season tawpa pakhatna nih a pawimawh thu a sawi.

Inkhel chungchang sawiin Pep chuan, "A tir minute thum kha kan khel ṭha lo a, a hnu lamah erawh kan khel ṭha takzet a ni. Goal hnihna kan khung dan kha offside thei dinhmunah kan awm a, kan rilru put hmang tur a ni. Referee-in whistle a ham hma chu inkhelah rilru zawng zawng kan pe tur a ni," tiin a sawi.

Man City hi match 11 chhung inelna hrang hrangah an chak zawn tawh a, January 30, Inrinni zanah table mawngphaha awm Sheffield United an mikhual ang.