Khalid Jamil-a Highlander an sang zel
Aizawl FC boss hlui Khalid Jamil enkawlna hnuaiah NorthEast United-in hma an sawn zel a, Jamil-a hnuaia match hnih an khelha an vawi hnih chakna ni turin ATK Mohun Bagan chu 2-1 in an hneh.
NorthEast United tan Luis Machado chuan minute 60-naah goal hmahruai a khung a, Mohun Bagan tan Roy Krishna chuan minute 72-naah a chhanglet - team pahnih squad leh tun hnaia an result enin Highlander hian chak lo tura ringtu an ngah zawk ang.
Mahse, Khalid Jamil-a enkawl team an danglam a, hun tawp nan minute kua chauh a awm tawh tihah Federico Gallego chuan Highlander tan goal-a rawn khung ve leh a, hun tawp thlenga goal dang lut tawh loin Highlander hi 2-1 in an chak.
Gallego-a goal khung hi minute 75-naa bench aṭanga luhtir Rochharzela siamsak a ni a, Aizawl FC aṭanga NorthEast United zawmtu midfielder hian Winning Pass of the Match chawimawina a dawng - Chhara hian goal khungna remchang a neih erawh a chhawr thei lo.
Highlander tan Lalengmawia chuan inkhel bul a ṭan bawk a, Vaivakawn rawlthar Apuia pawh a khel ṭha takzet - tun season-a a vawi hnih nan Bagan-in match khatah goal hnih an chhuah a, Kolkata club tlawm nan Mizo tlangval pahnih an thawh hlawk hle.
January 13-a coach nghet Gerard Nus an ban hnua NorthEast United enkawl hna thawktu Khalid Jamil chuan, "Ka player-te avanga hnehna chang kan ni a, an thawkrim em em a ni. Point thum kan hlawh theih chhan hi kan thawhhona ṭhat vang a ni a, ka hna ve chu player-te fuih phur hi a ni mai. Ka player-ten an theihna dik tak an pholang a ni," tiin champion lai ATK Mohun Bagan an hneh thei chu a lawm thu a sawi.
NorthEast United-in hnehna an chan avangin palinaah an invawrh chho a, semifinal khel tura an beiseina a sang ve zel - an chung chiaha awm Hyderabad FC nen an point hmuh zat a inang. Hyderabad hian zanin dar 7:30-ah team talbuai Bengaluru FC an hmachhawn ang.
Inkhel Result
NorthEast United 2 - 1 ATK Mohun Bagan
NEU: Luis Machado 60'; Federico Gallego 81'
AMB: Roy Krishna 72'
Zanin Inkhel Tur
Hyderabad FC 7:30 PM Bengaluru FC