Milan hnehin Inter an tlang

Inter Milan chuan an hmelma leh elpui AC Milan 2-1 a hnehin Coppa Italia semifinal an lut. Milan striker Zlatan Ibrahimovic chu hnawhchhuah niin, a goal hmahruai khung chu awmzia a awm ta lo a ni.

Thawhlehni zan San Siro a inkhelah Milan lamin Ibra hmangin goal an khung hmasa. Mahse, striker Romelu Lukaku-a'n penalty aṭanga a sut bakah, minute 90+7-ah Christian Eriksen-a'n free kick mawi hmangin chakna goal a khung.

Veng leh veng, khua leh khua inkhel a nih tawh chuan a boruak a sang ṭhin. Inter leh Milan inhuat zia pawh sawi nawn a ngai lo. An khelmual inṭawm San Siro chhungah nidang angin fans awm lo mah se a boruak a nep chuang lo.

Minute 31-naah Ibrahimovic chuan angle zim tak aṭangin 'cool' deuhin goal hmahruai a khung. Swede striker hian goal a khung hma hian goal ban hrulah teuh zetin a lo tauh chhuak tawh bawk, a hun ṭha neih vawi hnihnaah a hlah nawn lo a ni.

Manchester United tana khel dun tawh Ibra leh Lukaku te chawlhlawk hmain an inhnial buai a, yellow card pek an ni. Inkhel chawhnu lamah pawh boruak a san ngaiin a sang chhunzawm.

Serie A hmahruaitu Milan tlarhnung an inrem phui ṭha a, an goal a him tluan mai pawh a rinawm. Mahse, minute 58-naah Ibra chuan ṭul lo taka defender Aleksandar Kolarov a tih tluk avangin yellow card pahnihna pek niin an hnawt chhuak.

Player tam zawk Inter an phur thar, Rafael Leao-a'n box chhunga Nicolo Barella a tih tluk chu VAR hmanga en a nih hnuah penalty pek a ni. Lukaku-a pet chuan bar per mah se goal chhungah a lut zui a, si phurh a sut. Inter khel ṭha zui mah se Milan goalkeeper Ciprian Tatarusanu an paltlang thei lo. Amaherawhchu, Tottenham midfielder hlui free kick pet erawh Tatarusanu tan pawh dan theih a ni lo - season kal laia a goal hmasa ber chu chak nan an hmang.

Antonio Conte-a'n Spurs aṭanga a lak luh Eriksen a chhawr tam lo. Denmark international hian inkhelh tam duh vangin club dang a zawm mai dawn nia sawi pawh a awm hman, tunah erawh Italian manager hian an tan a pawimawh thu a sawi.

Conte chuan, "Inkhel hautak tak a ni. Milan kha team ṭha tak an ni a, chutih rualin player inzat kan nih lai pawh khan vanduai vang chauha goal khung lo mai kan ni zawk. Inkhel pumpui thlir khan inhnehtawk emaw chak lo emaw zawk ni ila a mak hial ang.

"Player zawng zawng an khel ṭha, chutih rualin hun pawimawh laia chiai lo Christian khan fak a phu. Player ṭha leh fing bik a ni a, hmathlir thui tak kan neih laiah pawh hmun pawimawh tak a chang a ni," tiin a sawi.

Stefano Pioli chuan chak lo mah se a naute a dem lo, an tlak chhan chu holam taka an player ṭha hnawhchhuah a nih vang niin a sawi. Tla mah se league lamah an rilru an sawrbing tur thu a sawi bawk.

Milan manager Pioli chuan, "Coppa Italia hi kan ngai pawimawh, kan tla hi pawi ka ti hle. Amaherawhchu chak loh hi a chang chuan kan pawm a ngai, khel ṭha viau mah ila kan kim loh hnuah kha chuan a harsa tawh. "Ibra-a card hmuh na hnuhnung zawk kha chu a nem deuh niin ka hria, mahse a hma lama thil thleng tawh te khan referee Paolo Valeri rilru a hneh pawh a ni mahna," tiin a sawi.