Match hmasa berah Sindhu chak lo

Nimin khan PV Sindhu chuan BWF World Tour Finals-ah a group match hmasa ber a khel a, world number 1 Tai Tzu Ying lakah 21-19, 12-21, 17-21 in a chak lo.

Tun hnai inelna a hmachhawn pahnihah Sindhu hian beisei a phak lo. World Tour Finals-ah erawh chak lo mah se a inkhelah hmasawnna hmuh tur a awm, minute 59 an inkhelh hnuah a vanduai mai zawk chauh a ni.

Rio Olympic silver medalist Sindhu chuan, "Ka khel ṭha thawkhat viau chuan ka hria, point khat chauh pawh hmu tur khan a awlsam lo thei hle. Group B hi a awlsam dawn lo a, match hmasa berah chak lo mah ila beisei erawh ka la nei dawn.

"Inkhelah rilru 100% ka pe chhunzawm dawn a, khelh hmabak pahnih ka la neihah hnehna ka chang a nih chuan knockout round luhna kawng a la inhawng zau," tiin a sawi. Nimin khan Group A lam pawhin an match hmasa an khel, world number 1 hlui Carolina Marin leh An Se Young te chuan hnehna an chang. 

Marin-i'n a khingpui Evgeniya Kosetskaya 21-19, 21-14 in a hneh a, South Korean nula Young pawhin Michelle Li 21-12, 21-17 in a hneh ve bawk.