Qatar-ah vawi hnih intlansiak dawn

MotoGP thuneitu lam chuan season ṭan dan tura an ruahmanna thar an puang. March 28 hian Qatar Grand Prix hmangin kum bul an ṭan ang a, Qatar-ah tho hian inelna pahnihna pawh an tlan zui ang.

Qatar Grand Prix hi zana eng (light) hnuaia tlan a ni dawn. April 4 hian Grand Prix of Doha an tlan zui dawn a, hei erawh chhunah a ni thung ang; a hnu lamah chuan Portugal ramah an intlansiak zui dawn a ni.

Thuchhuah siamin MotoGP chuan, "Coronavirus chuan na takin min ka nghawng zel. Loh theih lohna vangin Argentina GP leh Americas GP te chu a hun pangngaiah tlan theih a ni dawn lo, inelna ṭhenkhat pawh a hun siksawi leh a ngai dawn niin a lang.

"Hri leng mah se inelna neih theih dan tur kawng dap reng a ni dawn. Tunah chuan Qatar hian a bul min ṭansak dawn a, ram dangah pawh fimkhur tak chungin hlawhtling taka neih chhunzawm theih kan beisei," an ti.

Season hmasa khan Spain rama tlan kawng pakhat Jerez-ah inelna hmasa pahnih neih a ni. Kuminah hian nikum ang bawkin a hmuna entu an awm thei dawn lo, inelna buatsaihtu lam chuan a tam thei ang ber intlansiak neih theih an tum.