A ṭha ngai Man City leh Liverpool chak chiang

Premier League-ah match li lek an la khel nachungin Liverpool leh Manchester City te an ṭha fal tih a lang der tawh. Inrinni zan khan Jurgen Klopp-a hoten Turf Moor-ah Burnley 3-0 in an hneh a, Pep Guardiola hoten an mualah Brighton & Hove Albion 4-0 in an sawp ve bawk.

Inkhel dangah Manchester United chu player 10-a khel Southampton nen 1-1 in an inhnehtawk a, Chelsea pawhin Sheffield Wednesday laka goal hnih an khung hmasa chungin 2-2 in inkhel a tawp.

Etihad Stadium-ah Manchester City-in second 68-na lekah Kevin de Bruyne hmangin goal an khung a, Brighton tan thawhchhuah a beiseiawm lo nghal. City tan hian Sergio Aguero chuan goal hnih khung belhin Bernardo Silva-a'n a khung ve bawk a, 4-0 in hnehna an chang.

Pep Guardiola chuan, "Aguero hi talent nei ṭha bik a ni a, ni khatna aṭangin ka duh nghal. Club kal hmang thil tam tak kan thlak a, chuti chung chuan ni khatna aṭangin a inpekna hian minti lawm," tiin tun season match tina goal la khungtu Aguero a fak.

Man City tan lawm a kim lo a,  French defender Aymeric Laporte chu Adam Webster nen an insut vangin zawnchhuah a ni a,  damdawi inah hruai a ni.

Liverpool chuan Premier League match 13 chak zawn turin Burnley 3-0 in an hneh a, league match 13 a zawna an chak vawi khatna a ni. 

Clarets striker Chris Wood (33') chuan an lamah a tihluh hnuin  Sadio Mane (37') leh Roberto Firmino (80') ten an khung belh. Reds manager Jurgen Klopp chuan, "Pre season-ah tlarhma pathum an khel lo a, chutichung chuan inelna takah an tihtur tur an ti. Kan khelh tawh chin chu a lungawithlak hle," tiin a sawi.

Inkhelh zawha an sawi zui erawh Mane chet dan a ni a, Senegal international hi Mohamed Salah-a'n a pass loh vangin minute 85-naa an thlak chiahin thinrim takin coaching staff bulah thil thlen dan a hrilh.

German boss Klopp chuan, "Sadio khan a lungawi loh thu a thup thei lo. Tunah chuan kan inbe tawh a, kan chingfel tawh," tiin a sawi a, goal khung châka tuihal Mane rilru put hmang chu a duh zawng a nih thu a sawi tel bawk.

Chelsea striker Tammy Abraham-a'n season duhawm tak hmang chhoin Sheffield United lamah goal hnih a khung a, Frank Lampard hote point thum hmu turin dinhmun ṭha hman mah se an mual Stamford Bridge-ah Premier League kai thar lakah goal hnih an hum zo lo.

Sheffield hian second half ṭantirhah Callum Robinson hmangin siphurh an sut ṭhen a, minute khat chiah a awm tawh tihin Blues defender Kurt Zouma-a'n an lamah a tilut. Blades manager Chris Wilder chuan, "Kum thum liam ta kha chuan League One mawngphahah kan awm a, tunah chuan Chelsea mualah point kan hlawh chhuak. Nuam tawl tura Premier League khel kan ni lo a, autograph leh jersey thlenga lungawi tur kan ni lo," tiin club lian an hlauh loh thu a sawi.

Chelsea manager Lampard-a'n naupang chungah rinna a nghat ngam a, Blades laka bul ṭantute kum chawhrual hi kum 24 leh ni 158 chauh niin Premier League-a Blues bulṭantute naupan ber ṭum a ni hial. Amaherawhchu player naupangin an pu rinna hi point thumin an chhanglet thei lo.

Lampard chuan, "Naupang chher hriam a, khel tlaka chhuah hi a hlu. Chutihrualin point nen chuan a hlutna a inang chuang lo. First half-ah 2-0 in hma kan hruai tawh a, chak thei tur kan ni. Premier League hi a nun rawng a, goal thumna khung ngawt theih a ni lo. Goal hnih hi kan hum theih a ṭul," tiin tlarhnung a pawimawh thu a sawi.

St Mary's-ah Manchester United-in minute 10-naa Daniel James-a goal mawi hmangin hma hruai mah se goal dang an khung belh theih lo a, Southampton-in Jannik Vestergaard hmanga minute 58-naa an chhanlet avangin 1-1 in inkhel a tawp.

Norwegian manager Ole Gunnar Solskjaer-a'n tawnhriat nei ṭha Romelu Lukaku leh Alexis Sanchez te Inter Milan-ah kaltirin academy player leh tawnhriat nei tlem zawk player chungah rinna a nghat a, tun dinhmunah chuan a thutlukna a dik lo tih a lang.

Minute 73-naah Saints player Kevin Danso hnawhchhuah a nichungin United-in chance ṭha bik insiam an harsat a, goal khungtu James pawh pressure sangah a hmawr a bawk fuh thei lo - a famkim tawk lohna a lang. United rawlthar Mason Greenwood pawh bench aṭanga rawn lutin keeper Angus Gunn tan hna siamsak mah se Premier League bika a khelh danah fak a la rem rih lo.

Manchester United manager Ole Gunnar Solskjaer chuan, "Ho lam tal pawhin kan ti goal tur a ni. A hmawr bawkna turah kan fimkhur tawk lo a, kan tisual leh ṭhin. Tlarhma lam kan hriam tawk lo," tiin a sawi a, Norwegian manager hian United siam ṭha turin hna a la ngah hle, a puitlin thei dawn em  tih hriat a la ni lo.