Goal sarih luhna inkhelah Juve an chak
Italian champion ni tura rinkai pahnih inkhelah Juventus chuan an mikhual Napoli 4-3 in an hneh a, inkhel inhnehtawk taka danglama siamtu chu hun tawp dawna defender Kalidou Koulibaly-a'n an mahni lama a tih luh a ni.
Inrinni zan inkhel dangah AC Milan chuan Bresica chu 1-0 in an hneh, goal awmchhun hi Hakan Calhanoglu-a'n minute 12-naah a khung, tun season-a an point hmasa ber an hlawh chhuak.
Goal a tam
Allianz Stadium-a inkhelah Serie A champion hian Danilo (16'), Gonzalo Higuain (19') leh Cristiano Ronaldo (62') te hmangin 3-0 in hma an hruai fal, nuamsa taka chak tura ngaih an ni hman. Mahse, Napoli lam an beidawng bik lo. Nipui laia an lakluh player pathum Kostas Manolas (66'), Hirving Lozano (68') leh Giovanni di Lorenzo (81') te hmangin an si phurh an sut vek! Thi tawha ngaih kha an dam leh, mikhual tana inkhelh harsatna hmunah point hmu thei dinhmunah an ding.
Inkhel a la zo lo, minute 92-naah Juve lam freekick pet aṭanga ball kal pet chhuah a tumna lamah Koulibaly chuan an mahni lamah a pet pial lut a, keeper Alex Meret tan dan ngaihna a awm lo a, sutna hun a awm tawh lo bawk.
Inpeih lo?
Juventus manager Maurizio Sarri chu pneumonia vangin enkawl a la ni a, a team a la kaihruai thei lo - assistant manager Giovanni Martusciello chuan Turin club hi a enkawl a, midfielder Aaron Ramsey chu hliam vangin squad-ah telh a la ni lo bawk.
Warm up an neih laiin captain Giorgio Chiellini a inhliam, Italy international defender hmun ruakah hian Matthijs de Ligt rawn dingin, Dutch rawlthar tan Serie A bika inkhel bul a ṭanna hmasa ber a ni. Player hliam an neih bakah manager ber a la inpeih lo a, season hmasa Italian champion Juve kan hmuh ang kha chu an la ni chiah lo.
Carlo Ancelotti nauten season hmasa khan league match hnuhnung pahnih an khelh thlengin Juve an um tawk hle, kuminah pawh el phak tura ngaih an ni. Mahse, an league match hmasa zawkah Fiorentina 4-3 in an hneh hram, tunah goal li bawk an chhuah. 1931-32 hnuah season tir match hniha goal an chhuah hnem ber a ni, champion tur chuan tlarhnung siamṭhat a pawimawh ang.