Fati record Barca tan a tawk lo

Rawlthar duhawm Ansu Fati chuan Barcelona tana La Liga-a goal khung thei naupang ber record siam mah se Osasuna lakah a team a chakpui zo chuang lo a, an mikhualna ramah 2-2 in an inhnehtawk. 

Barca hian match thum an khelh tawhah point li chiah an la nei a, an insiamṭha vat a nih loh chuan coach Ernesto Valverde hi Nou Camp-ah kan hmu reng kher lo ang. 

Catalan club hian 2008-09 season khan an match hmasa pathum aṭangin point li chiah an nei a, hemi hnua season bul an ṭan chhiat ber a ni. Hriat tel atana ṭha erawh 2008-09 season hian Pep Guardiola hoin an champion. 

Nizan khan Atletico Madrid leh Real Madrid an inlan ve bawk a, he thu buatsaih a nih lai hian an result kan hre hman lo. 

UEFA forward of the season Lionel Messi chu hliam vangin a la inlan thei lo a, midfielder of the season atana thlan Frenkie de Jong erawh a inlan thung. 

Messi tel loin Barca-in ngai an la awh lo tih minute sarihnaah a lang nghal a, Roberto Torres chuan Osasuna goal hmahruai a khung. Barca-in goal an nei thei lawk lo - minute 51-naah Fati a rawn inlar a, kum 16 leh ni 304 mi hian La Liga-a Barca tana goal khung naupang ber ni turin si phurh a rawn sut. 

Catalan club tan Arthur chuan yard 16 vela hla aṭangin an goal hnihna a khung zui a, Barca hi an chak mai a rinawm. Mahse, Gerard Pique chuan handball vangin penalty a chawi a, Torres-a'n rawn khung lehin 2-2 in inkhel a tawp. 

Barca boss Valverde chuan, "Kan khel ṭha lo a, hmuh kan hrehawm hle zawk. Goal an khung hmasa a, a chhanglet turin kan hnaih thei thlawt lo. "Hetiang game-a chak loh hi a pawi a, inrintawkna kan mamawh a, kha aia goal nawr na tur kan ni," tiin a naute khelh danah a lawm lo. 

Kum 16 mi Fati hi 2012 aṭang khan Barcelona academy-ah a awm tawh a, Guinea-Bissau-ah piangin kum ruk mi lek a nih laiin Spain-ah an pem. 

Guinea-Bissau tan eng level-ah mah a la inlan lo a, Spanish media-te tarlan dan chuan Spain-in an youth team-a khel turin an duh. Kar hmasa khan kum 1941 hnua Barca tana inlan thei naupang ber record a lo siam tawh. 

La Liga bika goal khung thei naupang pathumna a ni a, Malaga player Fabrice Olinga (kum 16 leh ni 98) and Athletic Bilbao winger Iker Muniain (kum 16 leh ni 289) te chu ani aia La Liga-a goal khung thei naupang an ni.