Bayern Munich-in goal surtir

Inrinni zan Bundesliga inkhelah Bayern Munich chuan an ze pangngai chhuahin goal ruk ngawt an khung a, an mikhual Mainz chu 6-1 in an sawp; an elpui Borussia Dortmund erawh Union Berlin khelmualah 3-1 in an tlawm thung.

Allianz Arena-ah mikhual Mainz lamin Jean-Paul Boetius hmangin minute rukna lekah goal hmahruai an khung. German champion hian beisei angin chhang let rang thei lo mah se minute 36-naah Benjamin Pavard chuan David Alaba freekick aṭanga ball kal chu ti lutin an siphurh a sut.

Chawlhlawk hma chiahin Alaba-a'n an hmahruaina goal a khung a, second half-ah Ivan Perisic (54'), Kingsley Coman (64'), Robert Lewandowski (78') leh Alphonso Davies (80') ten a khat mawi tawkin goal an inkhung chhawk.

Bayern hian Mainz hi an ngam hle, an intawn hnuhnung match hnih lekah goal 12 ngawt an khung a, season hmasa an inkhelh ṭumin 6-0 ngawtin an sawp tawh bawk a ni.

Nicko Kovac-a naute hian match thum khelhah point sarih an hmu a, table-ah pahnihna an ni. RB Leipzig chuan Borussia Monchengladbach 3-1 a hnehin match thum an chak zawn, point khua hmain hmahruaitu an ni mek.

Borussia Dortmund chuan beiseina sang tak nen season bul ṭan mah se an duh angin an khel tluang rei lo. Inrinni zan khan Union Berlin lakah 3-1 in an tlawm a, kai thar Berlin tan Bundesliga match-a hnehna an channa hmasa ber 

an tawng.

Playoff hmanga Bundesliga khel tura inpet tling Union Berlin tan Marius Bulter-a goal hmahruai khung chu Dortmund lamin Paco Alcacer hmangin an sut, Alcacer goal hi winger Jadon Sancho siamsak a ni. Berlin tan Bulter bawkin second half tir lamah hmahruai vawi hnih nan goal a khung leh a, chak nemngheh nan Sebastian Andersson chuan a khung belh bawk avangin season hmasa Bundesliga pahnihna Dortmund an tho chhuak tawh lo.