Arsenal leh Tottenham inhnehtawk

Goal hnih an chhuah hnuah Arsenal chuan Tottenham Hotspur chu 2-2 in an inhnehtawkpui. Pathianni zan North London Derby hi a tir aṭanga a tawp thlengin a hmuhnawm a, Unai Emery leh Mauricio Pochettino hoten Premier League team ṭha an ni tih an pholang.

Emirates Stadium-a inkhelah mikhual lamin Christian Eriksen leh Harry Kane te goal hmangin 2-0 in hma an hruai, harsa lutuk loa chak tura ngaih an ni. Amaherawhchu Gunners lamin Alexandre Lacazette leh Pierre-Emerick Aubameyang te hmangin an sut a, defender Sokratis Papastathopoulos-a'n chakna goal a khungah inngai mah se offside vanga pawm a ni lo.

Tottenham manager Mauricio Pochettino-a'n chetsual theih a ni tih hriain goal venhim a ngai pawimawh a, hun ṭha an neih chhunah counter attack aṭangin na takin an nawr let. Erik Lamela-a shot chu Arsenal keeper Bernd Leno chuan lo dang mah se, ball per chu vengtu nei lo Eriksen-a'n minute 10-naah naumsa takin a khung.

Son Heung-min-a'n box chhunga ball a luhpui chu ṭha takin pet mah se German keeper Leno chuan a dansak thei hram. South Korea tlangval hi ven ngun ngai bik a ni a, a ball chang lai chu Arsenal captain Granit Xhaka-a'n ṭul lo taka ti tluin penalty a chawi a, striker Kane-a'n North London Derby bika a goal 10 khung nan a hmang.

Switzerland international Xhaka hian 2016 August thla hnu lamah Premier League-ah penalty vawi nga a chawi tawh a, ani aia chawi hnem an awm lo. Spurs laka a chawi pawh insum theihna emaw ngaihtuahna fing tak hmang ni se chuan chawi loh theih a ni - penalty a chawi bakah ṭul lo taka foul a ngah bawk.

Pierre-Emerick Aubameyang, Alex Lacazette leh Nicolas Pepe ten a vawi khat nan inkhel bul an ṭan rual a, chawlhlawk hma deuhin player thar Pepe ball pek chu Lacazette-a'n mawi taka la lutin chiang zetin a hlap a, beiseina mei mit ṭep chu chhem nunin a awm.

Second half-ah Gunners an phur thar, goal erawh an sual chhuak mai thei lo. Substitute Dani Ceballos luh hnuah game a nung zual a, mahse hliam vangin striker khel ṭha ber Lacazette lak chhuah a ngai thung - a aiawh a rawn lut Henrikh Mkhitaryan chu danglamna siam turin a hriam tawk lo.

Spanish midfielder Ceballos leh Matteo Guendozi te goal khung tur chu Spurs keeper Hugo Lloris-a'n ṭha zetin a dansak a, manager Unai Emery-a'n a rin ngam kum 20 mi Guendozi chu Gunners fans beiseina siamtu a ni, a tlan tam bakah ball a sem chhuak hnem, striker Auba goal tur a siamsak bawk.

Kyle Walker hmun ruak luahtu Kieran Tripper-a'n Atletico Madrid a pan leh tawh a, tun season a hman rim Kyle Walker-Peters chu hliam vanga chhawr theih a ni lo, right back atan Davinson Sanchez hman a ni - tlarhnung dinglam sir hi Poch-a naute talbuaina lai pakhat a ni.

Tlarhmaah erawh Spurs an hlauhawm, striker Kane a rintlak. England captain hian angle zim tak aṭangin goal ban a pet per dawp a, hun tawp dawnah penalty hlawh chhuak turah inngai mah se pek a ni lo bawk. Denmark player zinga EPL goal 50 khung thei hmasa ber Eriksen an chelh a nih chuan, a sira khel turin Son bakah Dele Alli a dam tawh bawk. Club lian dang lakah pawh an hmatawng hi an zahpuiawm loh hle.

Tottenham striker Harry Kane chuan, "Chak tura inngaih hnua kan chak zo lo kha a pawi, hun tawp lam minute 15 chhung vel kan talbuai kha insiamṭhat a ngai, chutihrualin kan theihna zawng zawng kan hlan," a ti. Hun tawp dawna a penalty hlawh loh chu 50/50 nia a hriat thu a sawi tel.

Arsenal manager Unai Emery chuan, "Result hi duhthusam chu a ni lo, amaherawhchu ka naute khelh dan leh fans puihna kan dawn danah ka lawm. Goal hmasa kan chhuah hma khan kan khel ṭha hle, a hnu lamah kan rilru paukhauh zia a lang bawk.

"Goal kan neih chiah khan inrintawkna min pek belh a, first half lama tihsual kan neih hnem ang khan second half-ah chuan kan siamṭha. Point hmuh kan phu a, tunah chuan tlarhnung leh hma lam inbuk tawk taka khelh dan kan zir chhunzawm a ngai," a ti.

Spanish manager hian midfielder Matteo Guendouzi chu a kum la naupang deuh mah se a lakah beiseina a neih san thu a sawi a, a khelh danah a lungawi bawk. Captain Granit Xhaka pawh chhanin Emery chuan, "Minute 90 chhung chuan tihsual palh a awm thei," a ti. Tihsual a neih ngun dan chhutin Arsenal fans tam tak chuan an manager ngaihdan hi an ṭawmpui a rinawm hran lo.