Champion lai Novak Djokovic a tla

Novak Djokovic chu US Open last 16-ah a zinkawng a tawp, champion lai hi nimin zing khan Stan Wawrinka nen an inhmachhawn a, set thumna an khelh laiin a dar vei lam hliam vangin a khel chhunzawm thei lo.

Roger Federer erawh a la ding nghet hle, Swiss star hian David Goffin chu 6-2, 6-2, 6-0 in a sawp; quarterfinal-ah Grigor Dimitrov a hmachhawn leh ang. Federer hian kumin US Open-ah match li khel tawhin set hnih chiah a la hloh.

Arthur Ashe Stadium-a inkhelah US Open, Wimbledon leh Australian Open champion ni kawp Novak Djokovic chuan a tir lam aṭangin a darah harsatna a nei a, a service a ṭha tawk lo. Darkar khat leh minute 46 inlan thei mah se 6-4, 7-5, 2-1 in a hnufual zawkah a ṭang.

Kum 32 mi Djokovic hi a match hmasa zawkah pawh a hliam vang hian a lo buai tawh, tun ṭuma a khingpui Stan lakah a service a ṭha tawk lo a, nidanga a hmachhuan ṭhin forehand a nat tawk loh bakah duhthusamin a che sawn rang lo.

World number 1 chuan, "Inkhel hmuhnawm en châkin fans an rawn pungkhawm a, hetiang dinhmuna ka ding mai hi pawi ka ti hle. Match puma khelh theih loh chu a rilru nat thlak, ka hliam hi a chang chuan ziaawm deuh mah se nat zual chang a nei," tiin a sawi.

Grand Slam vawi thum champion tawh Stan Wawrinka hi season hmasa khan hliam a neih ngun avangin beisei a phak lo, kumin tir lamah pawh a khel ṭha tawk lo. Tunah erawh a hliam a dam fel tawh, major title palina a beisei mek.

Wawrinka hi a service a naiin a ball vuak a dik a, champion lai Djokovic hi dam ṭhain inlan pawh ni se vanduai theihna tur a ni hrim hrim. Stan hi a khelh ṭhat ni chuan a ṭha ber berte hneh thei tura theihna nei sang a ni.

Kum 34 mi Wawrinka chuan, "Novak hi chu player puitling leh ropui a ni. Tennis player tan chuan khatianga court chhuahsan kha a hrehawm duh takzet," a ti. Quarterfinal-ah chuan seeded pangana Daniil Medvedev nen an inhmachhawn leh ang.

Roger Federer hi kum 38 mi a ni tawh a, a kum rualpui ten tennis khelh an chawlhsan tawh. Swiss star erawh Grand Slam khelh apiangin player hmuhnawm leh champion tura rinkai zingah a la tel thei zel.

US Open vawi nga champion tawh Federer-a'n darkar khat leh minute 18 chhung lekin David Goffin a hneh thei a, winners vawi 34 vaw chhuakin a khingpui Belgian tlangval erawhin ṭum riat chauh a vaw chhuak thei thung.

Grand Slam vawi 20 champion tawh Federer hi a chak chho zel a nih chuan semifinal-ah a hnampui Wawrinka nen an inhmachhawn thei dawn, a elpui Rafael Nadal nen final an thleng a nih chuan US Open bika an intawnna hmasa ber a ni ang.