A vawi khat nan Leclerc a chak

Charles Leclerc chuan car intlansiakna sang ber Formula 1-ah a vawi khat nan hnehna a chang ve ta a, hun rei tak chhung Ferrari-in chak ni hmel an hmuh lohna record chu a rawn thaichhe nghal bawk.

Pathianni zana tlan Belgian Grand Prix-ah Leclerc hian a hmasa ber aṭangin inelna bul a ṭan, lap hnuhnung ber an tlan laiin champion lai leh driver championship hmahruaitu ni bawk Lewis Hamilton nen an inthlauhna chu second khat chauh ni mah se hma a hruai tluan thei a ni.

Inrinni khan Formula 2 lamah Anthoine Hubert chu chesualin a thi a, kum 21 mi Leclerc elpui ṭhin leh ṭhian ṭha a ni. Ferari driver chuan Hubert-a chetsual chu pawi a tih thu a sawi chhuak a, hnehna a chan chu a ṭhianpa tan a hlan bawk.

Monaco tlangval Leclerc chuan, "Toro Rosso driver Pierre Gasly, Mercedes reserve driver Esteban Ocon leh Hubert te nen hian kan naupan lai chuan Formula 1 driver nih hi kan duhthusam a ni ṭhin. Hun lo taka kan chan mai hi a pawi ka ti a, F1 huanga a inlan hman lo hi ka ui puiin tun ṭuma hnehna ka chan pawh hi lawm taka awm thiam a harsa hle," tiin lawm a kim loh thu a sawi.

F1 hi kuminah intlansiak 21 a awm dawn a, chung zinga 13 chu an tlan tawh. September 8 hian Autodromo Nazionale Monza, Monza-ah Italian Grand Prix an tlan leh ang.