Hliam tuar Serena a chak

Serena Williams chuan a vawi 16 nan US Open quarterfinal a inhlangkai a, tennis inelna lian Grand Slam nomawi 24-na chawi thei turin kawng dik a zawh mek zel.

Pathianni zan inkhelah Serena hi set hnuhnung zawk an khelh laiin a kerek a hliam, enkawl a nih hnuah buaina nei loin a inkhel zui. Darkar khat leh minute 32 an inkhelh hnuah 6-3, 6-4 in hnehna a chang a ni.

Kum 37 mi Serena chuan, "Season hmasa leh kumin tir lamah hliam ka nei ngun a, tun ṭuma mi hi na tak ni lo mah se rilru a ti kal thui hman hle," tiin a sawi. Quarterfinal-ah chuan world number 2 Ashleigh Barty hnehtu Chinese nula Wang Qiang nen an intum leh ang.

Flushing Meadows, New York-ah Serena hian nomawi vawi ruk a chawi tawh, kuminah hian a champion leh a nih chuan Margaret Court (24 titles) nih rualin Open Era china Grand Slam nomawi chawi hnem ber an ni dawn. Inkhel dangah Johanna Konta chuan seeded pathumna Karolina Pliskova chu 6-7 (1-7), 6-3, 7-5 in a hneh a, a vawi khat nan US Open last 16 a paltlang.

Britain nula Konta hian a match dawt lehah Elina Svitolina a hmachhawn ang, seeded pangana Svitolina-i'n last 16 inkhel dangah Madison Keys 7-5, 6-4 in a lo hneh ve thung a ni.