Real = 1 point; Bale = 2 goals + red card

Real Madrid tan Gareth Bale chuan goal hnih a khung a, red card a hmu tel bawk. Barcelona chak zawh loh hnuah Real-in an khingpui team chet chhiat an chhawr thei lo a, khualmualah Villarreal chu 2-2 in an inhnehtawkpui. 

Barca leh Real tawlhthluk laiin Atletico erawh an kal zel a, an mikhual Eibar chu 3-2 in an hneh. Diego Simeone enkawl team hian match thum an khelh tawhah hnehna an la chang vek. 

Eibar-in Atletico barakhaihin goal hnih khung hmasa mah se mikhual team hian goal thumin an chhanglet a, a chak zawkah an ṭang zui. 

Match hnih an chak zawh loh hnuah Valencia an chak ve leh ta bawk a, tun season-a Champions League khel tur club hian 2-0 in Mallorca an hneh. 

Zinedine Zidane-a'n nipui transfer laiin, "Bale chhuah mai hi amah leh club tan a ṭha zawk a ni," tiin sawi mah se Welsh forward hi Real mamawh chhanna a lo ni reng a, goal hnih a khung. 

Villarreal tan Gerard Moreno chuan minute 12-na lekah goal hmahruai a khung a, nipui transfer laia pound maktaduai 300 dawn sengtu Real tana chhanglettu chu chhuahtir an tum hman Bale a ni. 

Goal dang lut loin chawlhlawk hman a ni a, second half-ah Villarreal bawkin goal an khung hmasa - Moi Gomez chuan minute 74-naah an hmahruaina leh goal hnihna a khung. Mahse, Real-in Bale an nei miau a, an beidawng lo. Ni 169 zet league-a goal a khung tawh loh hnua khungtu hian hun tawp nan minute li chiah a awm tawh tihah si phurh sutna a rawn khung leh a, Real an vannei. 

Villarreal laka 'Real an vannei' tih ṭawngkam hman a ngaih tawh chuan Madrid khaw club dinhmun a ṭha lo hle tihna a ni a, inenfiah an mamawh. 

Real vanduaina thlirtu tan hmuh tur a awm lo tawp erawh a ni bik lo. Second half-ah Real hi an insiamṭha a, mahse Toni Kroos khung ngei tur nia lang chu goalkeeper Andres Fernandez chuan a zawnin ṭha zetin a dang. Karim Benzema goal khung chu offside vangin pawmsak a ni lo a, inury time-ah Bale chu yellow card vawi hnih pek a ni a, hnawhchhuah a ni bawk!

Bale hi kum 2001 hnua Real Madrid player, league match khata goal hnih khung chunga red card hmu thei pahnihna a ni - Cristiano Ronaldo hnung a zui. 

Eibar-in minute 19 chhungin Atletico lakah goal hnih khung mah se rilru huaisen Atletico an beidawng duh lo a, hun a tawp meuh chuan 3-2 in hnehna an chang. 

Mikhual team Eibar tan Brazilian forward Charles chuan minute sarihna lekah goal hmahruai a khung a, Anaitz Arbilla chuan minute 19-naah a khung chhunzawm. Wanda Metropolitano-a fans sing chuang pungkhawm an hawihai a, an beisei loh result an hmu dawn niin an hria. Mahse, Diego Simeone-a naute an ni miau a, Atletico an beidawng ve lo. Pound maktaduai 113 man Joao Felix chuan Atletico a pan hnua a a goal hmasa ber khungin 'comeback' bul a ṭan. 

Atletico-in an si phurh an sut ṭhen hi minute 27-na a ni a, goal dang lut tawh loin chawlhlawk an hmang. Second half khelh a ni a, Atletico-in inkhel an thunun. 

Bench aṭanga luhtir Vitolo chuan minute 52-naah si phurh sutna goal a rawn khung a, a la tawp mai lo. Hun tawp a hnai tawh a, minute 90-na a ni tawh. Khel ṭha em em mai Diego Costa chuan Thomas Partey tan a siamsak a, Ghana midfielder hian an goal thumna a khung - Atletico an chak!

Chelsea forward hlui Costa-a'n goal khung lo mah se a khel ṭha takzet a, goal thum an khung aṭanga goal hnih chu a ke aṭanga chhuak a ni.