Mizoramin semifinal an lut Vawiinah Mizoram Vs Meghalaya

Junior National Football Championship for Dr BC Roy Trophy-ah Mizoram chuan knockout stage lut hmasa ber ni turin Inrinni khan Uttar Pradesh 5-0 in an sawp. Vawiin hian semifinal khelh nghal a ni dawn a, tlai dar 1:00 hian Mizoram hian inelna thlengtu Meghalaya an hmachhawn ang.

Mizoram hi group match hmasa berah Goa nen an inhnehtawk a, Delhi 2-1 chauha an hneh avangin semifinal lut turin Uttar Pradesh an hneh ngei a ngai. 

MFA Turf, Shillong-ah Mizoramin bul an ṭan ṭha a, Lalrintluanga'n minute 29-naah goal hmahruai khungin Lunglei Ramthar Veng forward Lalpekhlua Jongte-in minute thum hnuah goal hnihna a rawn khung zui a, hna harsa a awm tawh lo.

Second half-ah Rintluanga'n minute 63-na leh 82-naah khung belh lehin Hnahthial Electric Veng rawlthar hian hattrick a siam a, Bualpui NG rawlthar Gratus Lalhnehliana'n (60') goal khat a khung belh leh bawk. Mizoram manager Hmingthansanga chuan, "Kan player-te inpekna a sang a, semifinal kan thlen avangin kan lawm. Kan tum chu nomawi chawi a ni a, theihtawp chhuahin beih zel kan tum," tiin Vanglaini a hrilh.

Group A inkhel dangah Goa-in Delhi 1-0 in an hneh a, Mizoram an chak tak avangin Goa hi pathumna aṭangin pahnihnaah invawrh chho mah se an tla ta tho. Semifinal-a Mizoram khingpui tur Meghalaya hi group C pakhatna an ni a, Haryana nen point sarih ve ve hmu mah se goal difference-ah an ṭha zawk.

Meghalaya hian an match hnuhnung berah Sports Authority of India chu Wadajied Kynsai Ryngkhlem goal hnih hmangin 2-0 in an hneh a, group C inkhel dangah Haryana-in table mawngphaha awm Odisha chu 3-2 chauhin an hneh a, Meghalaya an vannei tak zawk. Semifinal-ah erawh Meghalaya hi inelna thlengtu an nih avangin a awlsam dawn lo.

BC Roy Trophy-ah hian Mizoram hi champion lai an ni a, nikum khan Cuttack, Odisha-a inelna neihah Mizoram hian final-ah Punjab 2-1 in an hneh.