Osaka nek chhuaktu Belinda Bencic
US Open hmeichhe singles bika inkhel sawi hlawh tak chu Naomi Osaka-i'n Coco Gauff a hneh kha a ni a, a hmuhnawm bakah a chak zawk Osaka hian tleirawl Gauff ṭap chu a hnem a, an pahnihin an ṭap zui. He inkhel hi Belinda Bencic chuan ngawi rengin a lo en, hnehna changtu zawk nen an inhmachhawn dawn vanga en a ni.
Thawhṭanni zan khan Arthur Ashe Stadium-ah Osaka leh Bencic te an inkhel zui a, darkar khat leh minute 27 an inhmachhawn hnuah seeded 13-na Bencic hian champion lai Osaka hi 7-5, 6-4 a hnehin quarterfinal a inhlangkai. Semifinal lut tur chuan Donna Vekic a paltlang leh a ngai dawn.
Mangṭha Osaka
Season hmasa US Open-ah Osaka hian khawvel barakhaihin Serena Williams hnehin nomawi a chawi. Australian Open-ah hlawhtling zuiin world number 1 dinhmun a luah hial, mahse a hnu lamah erawh nomawi lian a la vaw chhuak leh lo.
Bencic leh Osaka an inkhel tawk hle a, set khatna tawp dawnah Japanese nula hian a service hloh zauhin set a chan, set hnihnaah pawh game ngana an khelh laia che fuh lo lehin a service a hloh leh. Switzerland nulain a hun ṭha neih chhawr ṭangkaiin hnehna a chang tlang zui nghal.
Kum 21 mi Osaka hian a nomawi a hloh bakah world number 1 a nihna chu a chan dawn, kar lehah WTA ranking chhuak tharah chuan French Open champion Ashleigh Barty-i'n a chung ber dinhmun a luah leh
tawh ang.
Thawnthu
Osaka leh Bencic te hi kum 1997-a piang an ni a, naupan lai aṭanga tennis ngainatu ve ve an ni. Osaka hian junior huangah sulhnu a nei lian hran lo. Bencic erawh junior world number 1 hlui a ni a, match 39 zet a zawna hnehna a chan chu record a ni bawk. Junior-ah chuan Grand Slam title pahnih a la hman.
Kum 17 mi an nih chuan Bencic hian 2014 khan US Open quarterfinal a in vaw kai der tawh a, Swiss nula hian lawmman atan $370,250 (Nuai 267.36) zet a dawng. Hetih hunlai hian Osaka erawh ranking sang 250 zingah pawh a la tel phak lo; $25,000 (Nuai 18.07) dawn theihna tur tournament velah a la inlan kual zak zak.
Season ruk liam ta khan player pahnih hi an intawng thut a, player ṭha zawka ngaih Bencic chu chiang takin a chak lo. Bencic chuan, "Tun hmain ani hi ka hre ngai lo, mahse tharum a ngahin player dangte neih loh theihna sang tak a nei a ni," a ti hial, a sawi sual lo.
Naupan laia player ropui leh ṭha zawk Bencic hian tun thengin Grand Slam nomawi a la chawi rih lo a, naupan laia sulhnu chhuan tur nei tam lo Osaka erawhin major title pahnih a nei der tawh. Tunah kum 22 mi ve ve an ni a, an inelna chanchin hi a la tawp mai dawn lo niin a lang.
Engtin zel?
Player pahnih chanchin a ngaihnawm chhunzawm, hmabak nei êng tak an nih avangin mipui ngaihven pawh an hlawh. Kumina an intawn tawhna pathumah chuan Bencic hi a chungnung vek; US Open hma khan Indian Wells leh Madrid Masters-ah a chak zawk a lo ni tawh.
World number 12 Bencic chuan, "Naomi Osaka hi champion lai a nih avangin a hautak dawn tih chu ka hre lawk. Mahni inveng fimkhur tak chung siin ka bei let, ka beisei ang takin ka khel ṭha hle a ni," tiin hnehna a chan hnuah a sawi.
Chak lo zawk Osaka chuan, "Tunah chuan ka result avang hian ka lawm lo. Amaherawhchu, tun tournament ka khelh aṭang hian thil tam tak ka zir chhuak a ni," a ti. Third round-a a hneh tak kum 15 mi Coco Gauff ṭap a hnem avangin Osaka hian fak a hlawh hle.
Women's Singles
Last 16 Results
Belinda Bencic bt Naomi Osaka
(5-7, 4-6)
Donna Vekic bt Julia Gorges
(6-7, 7-5, 6-3)
Elina Svitolina bt Madison Keys
(7-5, 6-4)
Bianca Andreescu bt Taylor Townsend
(1-6, 6-4, 2-6)
Elise Mertens bt Kristie Ahn
(6-1, 6-1)
Quarterfinal
September 3, Thawhlehni (Result kan hre hman lo)
Elina Svitolina vs Johanna Konta
September 4, Nilaini
Serena Williams vs Wang Qiang
Belinda Bencic vs Donna Vekic
Bianca Andreescu vs Elise Mertens