Mizoramin Goa an sawp

Basketball Federation of India buatsaih 46th Sub Junior National Basketball Championship 2019-ah Mizoram chuan nimin khan an match hmasa berah Goa chu 89-1 in an sawp.

Mizoram tan player 10 inlanin point an nei vek a, Republic Vengthlang naupang Easter Malsawmtluanga'n point 16 hmuin point a lut hnem ber. Dennis Vanlalmawia (manager) leh Marc L. Sailo (coach) te kaihhruai Mizoram team hian vawiin tlai dar 4:45 hian Delhi an hmachhawn leh ang. Mizoram hi group E-ah Goa leh Delhi bakah Tripura nen an awm a, hmarchhak state zinga mi Tripura nen hian September 5 zan dar 7:15-ah group match hnuhnung ber an khel ang.

Mizoram hi Level 2-ah an awm a, Level 2 kai turin group hmahruaitu nih bakah group D pakhatna an hneh a ngai. Group D-ah hian Telangana, Gujarat, Manipur leh Uttarakhand an awm. Mizoram coach Marc L. Sailo chuan, "Mizote hian theihna sang tak kan nei a, Goa-in point khat chauh an nei chungin kan theihna zawng zawng kan chhuah. Kan khelh hmabakah Mizoram tan theihtawp kan chhuah zui ang," tiin Vanglaini a hrilh.