United pan vangin Sanchez a inchhir lo

Manchester United aṭanga loan-a Inter Milan pantu Alexis Sanchez chuan Arsenal chhuahsana Old Trafford a pan kha a inchhir loh thu a sawi a, hlawhtling tura khelhna hmun a chan tam tawk loh thu erawh a sawi lang. 

Kum 30 mi forward chuan, "Manchester United ka zawm thei kha ka lawm takzet. England-a nomawi chawi ngun ber club an ni a, ka pan kha ka inchhir ngai lo. Arsenal kha a nuam ka ti a, mahse khatih hunlai khan United kha an indinthar mek a, an hnena kala champion kha ka duh ber a ni. Ka inchhir ngai lo," a ti. 

Sanchez hian Arsenal tan match 166-ah goal 80 a khung a, mahse January 2018-a United a pan hnuah ngai a awh leh tawh lo. Chile tan erawh kumin Copa America-ah player ṭangkai a ni a, semifinal an luh nan a thawhhlawk hle. 

Kar khata £400,000 hlawha United player hlawh hnem ber dinhmun lo chelh tawhtu Sanchez chuan, "Ram tana ka khelh hian ka hlim ṭhin. United-ah khan ka hlim lo a ni lo. Mahse, minute 60 te ka khel a, a dawt match-ah min khelhtir lo zui a, a chhan lah ka hre ngai si lo. Hun min pe se chuan ka theihna sang berin ka khel ang," a ti. 

Sanchez hian United tan match 77-ah vawi 31 chiah bul a ṭan a, chung zinga match 13-ah chiah chuan a khel tluan. Red Devils tan hian match 45-ah goal nga chiah a khung.