European transfer a tawp ta

European football transfer bazar chu Thawhṭanni zan khan a tawp ta a, nipui bazar hun chhung zawnga thawm nei na ber Neymar chu Paris St-Germain-ah a cham dawn!

Hetihrual hian Inter Milan striker Mauro Icardi chuan loan-in PSG hi a pan thung a, Real Madrid goalkeeper Keylor Navas chuan French club hi a zawm bawk. 

Radamel Falcao chuan France chhuahsanin Galatasaray a zawm chiang a, Colombian striker hi aiport-ah fans 25,000 velin an lo hmuak. 

Mizote ngaihven Premier League player zingah chhuak langsar an awm lo a, loan-a Sporting Lisbon pantu Everton winger Yannick Bolasie chu transfer tawp zana langsar bera chhal ngam a ni. 

Brazilian forward Neymar-a'n ualau takin PSG chhuahsan a duh tih tilang mah se a duh angin thil a kal lo a, French club tan a la khelh chhunzawm dawn. 

Neymar hian a club hlui Barcelona-ah kir a duh a, mahse Catalan club leh PSG an inrem thei lo. Barca hian sum an sen hnem tawh avangin season khat loan-a hawh zet a, season thara a man pek an duh. 

Mahse, PSG-in player pek tel an beisei. Philippe Coutinho chu hming lam rik hmasa ni mah se Brazilian midfielder hian Neymar mana kal tel a duh lo a, Bayern Munich a zawm. Barca hian Ousmane Dembele an 'thawh' leh a, mahse French forward hian PSG pan loa Barca-a cham a duh tlat - a fel thei lo. 

Neymar hian PSG general manager Jean-Claude Blanc hnenah August 30 khan lehkha a thawn a, ama pawisa pound maktaduai 18 chu a chhuah theih nan pek a inhuam thu a hrilh. 

Mahse, French football federation dan avangin PSG chuan Neymar-a dilna hi an hnawl a, Brazilian forward beiseina a tawp. September 1 khan friendly match khel tur Brazil team a zawm a, a chhungte hnenah PSG-a a cham tur thu a sawi. 

Neymar hian engvanga PSG chhuahsan chak em em nge a nih? tih zawhna a awm. August 2017-a pound maktaduai 200-a French club pantu hian referee-in anchhan tawk loah a ngai a, fan-te lawm a hlawh tawk loah a ngai a, a khelhpui ṭhenkhat chuan an thik niin a hre bawk. 

Amaherawhchu, beisei anga thil a kal tak lohah chuan Lionel Messi nena khel dun leh tur chuan a nghah leh deuh phawt a ngai dawn tihna a ni. 

PSG-in Neymar an chelh a, Icardi leh Navas an lakluh bawk avangin transfer tawp ni hmang ṭha bera chhal theih an ni. 

Inter boss Antonio Conte-a'n Icardi a hmang duh lo tih a chian avangin Argentine striker hian loan-in PSG a pan a, French club a pan hma hian Inter-ah hian kum hnih chhung atan contract a pawtsei. Mahse, PSG hian season tawpah Icardi hi a ngheta an lalut duh a nih chuan pound maktaduai 59-in an lalut thei dawn. 

French champion hian forward an neih ṭhat sa avangin Inter tan match 219-a goal 124 khung thei striker hi eng ang takin nge an hman dawn hriat a châkawm. 

Real Madrid goalkeeper Keylor Navas chuan kum li chhung khel turin PSG a zawm a, Real tan kum nga a khelh chhunga Champions League nomawi vawi thum chawi thei goalkeeper hian first choice nih a beisei ang. 

Kum 32 mi Navas hian kum 2018-a Real-in Thibaut Courtois an lakluh hnuah hmun a chang phak lo a, PSG lam hi a pan ta a ni. PSG goalkeeper Alphonse Areola chuan season khat chhung atan Real hi loan-in a zawm thung a, kum 26 mi goalkeeper an lakluh danah Real-in an lei theihna tur ziah tel a ni lo. 

French club hian Sevilla aṭangin Sergio Rico chu loan hmangin an lo hawh tawh bawk a, July khan goalkeeper Gianluigi Buffon chu Juventus lamah an lo kir tir tawh. 

Turkey pantu Falcao 

Pathianni khan fans 25,000 zetin Istanbul khawpuiah Radamel Falcao an lo hmuak a, kum 33 mi striker hian Thawhṭanni zan khan Galatasaray-ah kum thum khel turin contract a ziak. 

Brighton forward Florin Andone leh Southampton midfielder Mario Lemina chuan season khat chhung loan-a khel turin Turkish club hi an pan bawk. Everton winger Yannick Bolasie chuan season khat chhung loan-a khel turin Sporting Lisbon a pan a, season hmasa khan Aston Villa leh Anderlecht-ah loan-in a khel tawh. 

Kum 30 mi forward hian 2016 khan Crystal Palace aṭangin Everton a pan a, a hunlai hian pound maktaduai 25 man niin kum nga chhung atan contract a ziak. 

Reds academy chhuak Ryan Kent chuan pound maktaduai sarihin Rangers a zawm a, kum li chhung atan contract a ziak - Steven Gerrard enkawlna hnuaiah a khel ang. 

Liverpool hian nipui transfer-ah player hralhna aṭangin pound maktaduai 35.9 an lalut a, player lei nan pound maktaduai 1.3 chiah an seng thung. Premier League player dang zingah Saints defender Wesley Hoedt chuan Belgian Pro League club Royal Antwerp chu season khat chhung atan loan-in a pan. 

Bournemouth goalkeeper Asmir Begovic chuan season khat chhung atan loan-in Qarabag a zawm a, Azerbaijani club hian Europa League an khel dawn.