Srikanth a chak lo nghal

BWF World Tour Finals khelh laiah Kidambi Srikanth chuan Nilaini zan khan a match hmasa ber a khel a, tun hnaia khel ṭha tluang tak Anders Antonsen a ngam lo nghal.

Denmark tlangval Antonsen hian Srikanth lakah 15-21, 21-16, 21-18 in hnehna a chang. Srikanth hi chak lo mah se a inkhelah hmasawnna hmuh tur a awm, darkar khat leh minute 17 chhung zet an inkhelh hnuah a vanduai thung.

Srikanth hma hian hmeichhe singles lamah PV Sindhu pawh a match hmasa berah a lo tlawm tawh. Group hrang hranga an inṭhen avangin match hmasa berah chak lo mah se knockout stage luh beiseina erawh an la nei reng a ni.

Inelnaah hian a thiam pariat chin chiah an inlan. Mipa singles, hmeichhe singles, mipa doubles, hmeichhe doubles leh mixed doubles huangah khawvel huapa ranking sang pariat zel an inel.