Champions League khel tur FC Goa

AFC Champions League draw neih a ni ta a, Indian club zinga Champions League khel hmasa ber tur FC Goa chu Group E (West Zone)-ah dah an ni a, an tan a awlsam dawn lo. 

Group E-ah hian Iranian club ṭha leh langsar Persepolis FC leh Qatari club Al Rayyan SC-te nen an awmho a, playoff lama UAE club Al-Wahda FC leh Iraq club lar Al-Zawraa SC-te inkhela chak zawkin an zawm leh bawk ang. 

Hetihrual hian Champions League hnuai chiah AFC Cup draw pawh neih a ni a, ATK Mohun Bagan chu Group D (South Zone)-ah dah an ni a, preliminary round two aṭanga khel tur Bengaluru FC chuan round one lama Nepal Army Club leh Sri Lanka Police inkhela chak zawk an hmachhawn dawn thung. 

Asia khawmualpuia football thuneitu sang ber Asian Football Confederation (AFC) chuan AFC Champions League-a team 32 tel ṭhin chu 40-ah an tisang a, hei vang hian kum danga preliminary round aṭanga inelna hmachhawn ṭhin Indian club tan Champions League-ah kawng a inhawn phah. 

Season hmasa ISL champion chu ATK an ni a, mahse, AFC danah Indian champion hian Champions League an khelh a thiang lo - hei hi a chhan ber chu India rama league sang ber champion hi league round zawh hnua knockout hmanga zawn a nih vang a ni a, AFC danah chuan ram khat club champion chu league hmanga zawn tur a ni. 

Hei vang hian All India Football Federation (AIFF) chuan ISL league round-a point hmu sang ber chu League Winners Shield a pe a, ATK chu Indian champion ni mah se league-a point hmuh hnem lama an phak loh FC Goa chuan Champions League hi an khelh dawn phah ta a, an vannei. 

FC Goa-in Champions League-a team pung an vanneihpui a, Indian club zinga AFC Champions League group stage match khel hmasa ber an ni dawn ta - an khingpui tur club enin last 16 luh erawh thil awlsam a ni dawn lo. 

Persepolis hi season li chhung a zawna Iranian champion ni mek an ni a, season hmasa Champions League-ah khan final an thleng bawk - an nep lo tih a chiang a, Goan club tan hna a awlsam lo ang. 

Al-Rayyan SC hi season hmasaa Qatar Star League-a pahnihna an ni a, an ram league-ah hian vawi riat an champion tawh - Paris Saint-Germain boss hlui Laurent Blanc enkawlna hnuaia awm mek an ni a, an tawh a khirh ang. 

AFC Champions League-ah hian group tinah team pali zel awmin group 10-ah ṭhen an ni a, group A - group E hi West region-ah dah an ni a, group F - J hi East region-ah dah an ni thung. Group tina a sang ber chu last 16 lut chiang tur an ni a, pahnihna ti ṭha zual parukin last 16 hi an lut bawk ang - east region aṭangin group-a pahnihna ti ṭha zual pathumin last 16 an lut ang a, chutiang thoin west region aṭangin pahnihna ti ṭha zual pathumin last 16 hi an lut bawk ang. 

Covid-19 vangin inelna hi hmun khata khelh tur a ni dawn a, Champions League West Region group stage match hi April 14-30 inkara khelh zawh tum a ni a, East region hian April 21-May 7 inkarah an khel zo thung dawn a ni. 

Round of 16 leh quarterfinal chu match khat hmanga chinfel tur a ni dawn a, last 16 hi September 13-15 inkarah khelin quarterfinal hi September 27 - 29 inkarah zawh tum a ni - semifinal hi double leg niin October 19-20 leh 26-27-ah khelh a ni ang a, final hi double leg thoin November 21 - 27 inkarah khelh a ni ang. 

Season hmasa ISL champion an nih avangin ATK chu AFC Cup preliminary round two khel tur an ni a, mahse, Mohun Bagan nen an inzawm tak avangin I League champion chanpual AFC group stage chu an chang ta zawk. 

ISL champion ATK-in Bagan an zawm takah chuan ISL champion an nihna anga an hmun ruak chu pathumna Bengaluru hnenah pek a ni a, anni hian preliminary round two an paltlang chuan playoff an khel leh ang a, hetah hian an chak leh chuan AFC Cup group stage an khel thei ang. 

ATK Mohun Bagan hi group D-ah awmin, point an hmuh san ber chuan Inter-zone playoff semifinal an khel ang a, an chak chuan inter-zone playoff final an khel leh ang a, an chak leh chuan final an lut thei dawn a ni.