Messi goal nen Barcelona an chak

Hrem vanga tualchhung inelna match hnih a khelh theih loh hnuah Lionel Messi a lo kir leh ta a, Barcelona forward hian Copa del Rey last 16-ah goal khungin a team chu 2-1 in hnehna a chanpui. 

Barcelona hian an mikhualna ramah Rayo Vallecano chu 2-1 in an hneh a, Spanish second division club tan Fran Garcia chuan hmahruaina goal khung mah se Catalan club tan Messi leh tun hnaia form em em mai Frenkie de Jong-ten an chhanglet. 

Copa del Rey last 16 inkhel ngaihven hlawh dangah Sevilla chuan 3-0 in Valencia an hneh bawk a, Luuk de Jong chuan goal hnih a khung bakah Ivan Rakitic chuan goal khat a khung bawk. 

Almeria leh Osasuna inkhelah erawh goal a luh loh avangin penalty hmanga chak zawk zawn a ṭul a, a tawpah second division club zawk Almeria-in 5-4 in hnehna an chang. 

Spanish second division club lakah Messi-a lo kir a, Ronald Koeman-a'n nomawi chawi a duhzia a pholang - mahse, goal khung hmasatu erawh rin loh takin Rayo Vallecano an ni.

First half-ah goal a luh loh hnuin chawlhlawkah mualneitu Rayo-in Barca hmaa tlawm an tum lo tih an pholang a, minute 63-naah Fran Garcia chuan awlsam takin hmahruaina goal a rawn khung. 

Mahse, Rayo hlim chhung a rei lo. Goal an chhuah aṭangin minute ruk a liam a, Messi chuan match hnih a chawlh chhung lekin a thiam thil a la theihnghilh hman lo tih pholangin si phurh sutna goal-a khung. 

Barca-in goal dang khung chhunzawm tur erawhin minute 80-na an nghah thlen a ngai a, tun hnaia vawi tam Barca chhanhimtu Frenkie de Jong chuan chakna goal-a rawn khung.

Barca an chak chuan Messi hming lam rik a ngai leh ṭhin a, Rayo lakah pawh Catalan club-in Argentine forward an mamawhzia a lang nawn a ni ber. 

Messi si phurh sutna goal hi Antoine Griezmann siamsak a ni a, Messi hi kum 33 mi ni tawh mah se a la tar ve lo niin a lang - tun season inelna hrang hrangah match 23 khelin goal 15-a khung tawh a, assist vawi ruk a nei thei. 

De jong-a chakna goal khung nana tha thawhtu pawh Messi bawk a ni a, bench aṭanga luhtir Jordi Alba tan ball ṭha tak a siamsak a, Alba hian De Jong tan siam ve lehin Dutch midfielder hi goal khung turin a tlan ṭha takzet bawk. 

Kum 23 mi De Jong hian tun season-ah Barca tan match 27 khelin goal nga a khung a, assist vawi li a nei bawk - a kum a la tam loh avangin a chungah beiseina a sang hle. 

Spanish La Liga piahlamah Sevilla-in an chet ṭhat an chhunzawm zel a, Copa del Rey quarterfinal lut turin Spanish top flight football-a an elpui Valencia chu 3-0 in an sawp. 

Sevilla hian first half chhungin goal hi an khung hman vek a, Luuk de Jong chuan minute 20-na leh 33-naah a khung a, 38-naah Rakitic chuan a khung ve leh bawk - Valencia-in a chhanletna tur an nei lo. 

Almeria khelmualah Osasuna chu chak tura ngaih ni mah se vawi 23 shot an nei chungin goal an hlawh chhuak thei lo a, extra time khelh a ngai hial - club pahnihin goal an la khung lo cheu!

A tawpah penalty hmangin chak zawk zawn a ni a, second division club Almeria chu chak zawkah an ṭang. Osasuna tan Manu Sanchez leh David García-ten an pet goal lo a, Almeria tan player paruk zingah José Corpas chauhin a pet goal loh avangin a tawpah 5-4 in Almeria an chak.