Vawiinah I League match thum a awm dawn

Indian football-a inelna sang ber dawttu I League pawh khelh chhunzawm zel a ni a, vawiinah match thum en tur a awm dawn. 

Vawiin chawhnu dar 2:00-ah I League club thar pahnih RoundGlass Punjab FC leh Sudeva FC-te an inkhel dawn a, team pahnih hian boruak an neih len ang huin khelmualah erawh an la ropui lo hle. 

RoundGlass hian Bhutanese forward ṭha mi Chencho Gyeltshen, Indian player tawnhriat nei ṭha Sanju Pradhan, Rupert Nongrum leh Spanish attacking midfielder Joseba Beitia-te an kawl chungin match liah vawi khat chiah chak an la nei a, vawi hnih tlawmin vawi khat draw result an nei. 

Sudeva hi Indian player hlanga khel an ni a, Punjab club ang thoin match li khelh aṭangin point li bak an la nei thei lo - he club hian Mizoram player Vanlalzahawma, Lalliansanga Renthlei, Lalramhmunmawia leh Sairuatkima te an kawl. 

Tlai dar 4:00-ah Chennai City leh Indian Arrows an inkhel dawn a, Indian rawlthar beiseiawm rual dah khawmna Arrows-ah hian forward Vanlalruatfela Thlacheu, midfielder Lalchhanhima Sailo leh P. Lalrampana te chu Mizo awm an ni a, Chhantea hi Arrows Captain a ni.

Zan dar 7:00-ah Churchill Brothers leh Manipur club Trau an inkhel dawn a, match li an khelh tawha tlawm la nei lo Churchill hian Lalengzama Vangchhia leh Vanlalduatsanga chu Mizo player an kawl a ni - Trau hian Mizoram player kawl an nei lo.