Sheffield-in Man United boruak vaw dai

Tun season Premier League-a Manchester United hma hruai hun chu zîng ṭiauchhûm leh dai tla ral leh thuai ṭhin ang lek a ni a, Manchester City êng ngam loin a ral ta.

Ole Gunnar Solskjaer-a hote tan league hmahruaitu ni leh turin Nilaini zana table mawngphaha awm Sheffield United hneh tawk mah se 2-1 in an chak lo. 

Man United hi pahnihnaah an la awm tho a, point khat chauhin pakhatna Man City nen dai dan mah se khelmuala an chet dan aṭanga tehin an inkar a zau leh ta hle.

Old Trafford-ah Sheffield United-in Kean Bryan hmangin goal an khung hmasa a, mualneitu lamin captain Harry Maguire hmanga si phurh an sut avangin lehthal turin beiseina an nei sang hman hle. 

Amaherawhchu Blades tan substitute Oliver Burke-a'n chakna goal a khung ta zawk. Man United ṭantute suangtuahnaah nomawi hial lang hman mah se team chhe ber Sheffield-in a tak rama cheng leh turin an beng harh.

Ole Gunnar Solskjaer-a'n FA Cup-a Liverpool an hneh ṭum aṭangin player panga a thlak a, tlarhnungah pahnih ngawt a thlak avangin Norwegian manager-in table mawngphaha awm Sheffield United a dah hniam deuh a tih theih.

Amaherawhchu Edinson Cavani tel lohna Man United inkhel a nung tawk lo a, minute 10-na lekah Marcus Rashford-a'n box chhung chiah aṭangin goal pawnah chiah a pet. 

Sheffield-in mualneitu barakhaihin goal an khung hmasa a, minute 23-naah John Fleck-a corner chu Kean Bryan-a'n a tauh lut. Goal luh theih nan hian Billy Sharp-a'n keeper De Gea a nek sawn.

Darkar chanve hnuah Anthony Martial hmangin United-in siphurh sutah an inngai a, amaherawhchu Maguire-a'n keeper Aaron Ramsdale a sut deuh avangin pawm a ni lo. French forward Martial-a'n chance ṭha a hlah leh bawk.

Second half-ah United khel a nung hret a, Maguire-a'n minute 64-naah Alex Telles corner tauh lutin siphurh an sut a, an phur thar hle. Solskjaer-a'n chak ngei tumin Cavani a luhtir a, Chris Wilder-a'n counter attack hman ṭangkai tumin player tlan chak Oliver Burke a luhtir ve bawk.

Uruguayan forward Cavani a tlan taihmak avangin United goal nawr a na sawt a, amaherawhchu tlarhnung ṭhat tawk lohna chuan an goal nawr tur a ti ṭhuanawp ta thung. Minute 74-naah United-in ṭum hnih a zawn zatin box chhung aṭangin an pet chhuak ṭha tawk lo a, an insiamrem loh bawk avangin Burke-a'n Sheffield tan goal pawimawh bik a khung.

Blades-in a ṭum hnihna atana hma an hruai hnuah an phur thar a, tlarhnung an rem phui bawk avangin United tan Donny Van de Beek leh Luke Shaw te luh belh mah se danglamna an thlen thei lo. Sheffield-in kum 1973 hnua a vawi khat nan Old Trafford-ah hnehna an chang.

Manchester United-in pakhatna dinhmun luah let theihna hun ṭha an bawhpelh a, Ole Gunnar Solskjaer chuan, "Referee-in tihsual pahnih a nei. Goal khatna luhna turah Billy Sharp-a'n ball tel loin keeper a su a, foul a ni. Anthony-a goal khung turah khan Harry kha a foul lo," tiin chak loh chhuanlam a nei.

Norwegian manager Solskjaer chuan sawi chhunzawmin, "Kan chak loh dan uluk taka chhui a ni lo ang. Tun season-ah result mak tak a awm a, hetiang karah hian khel tluang ber zinga mi kan ni zawk. Tun ṭumah erawh vanduaina kan chunga a tla ve ta a ni," tiin a sawi.

Sheffield United manager Chris Wilder chuan, "Tun season-ah kan tan thil ṭha a thleng meuh lo. Tun ṭuma kan chaknaah pawh kan player-ten an lawm chiam a, an tih tur tak pawh a ni. Naktukah erawh an dinhmun taka awm leh turin ka vaw hniam leh tawh ang," tiin a lawm thu a sawi.

Blades-in match 20 aṭangin point riat an hmu a, an chung chiaha awm West Brom chu point thum chiahin an pha tawh lo. United tana point thum hloh a pawi ang chiahin Sheffield tan point thum hmuh hi a hlu hle.

Manchester United-in chak loh hun chu an nei dawn a, amaherawhchu tun hnaia an khelh dan thlirin Sheffield United laka tlawm tur niin an lang lo. Ole Gunnar Solskjaer-a'n an chak loh chhanah referee-in a tihsual ṭum hnih chu a sawi lang, chutihrualin Norwegian manager pawhin thutlukna a siam fuh tawk lo ve bawk.

United elpui Manchester City-in Sheffield United chung chiaha awm West Brom an hmachhawn ṭumin Pep Guardiola-a'n Baggies boss Sam Allardyce a fin thu a sawi bakah a chhawr theih player aṭangin an ṭhat dan tur ang berin team a siam.

Norwegian manager Solskjaer erawh FA Cup aṭanga Liverpool an petchhuah avangin ngai a la awh lo a, a team-te chu an nihna aiin a ngai ṭha hret niin a lang. United boss hian tlarhnung inrem fuh sa chu a sawi danglam a, rawlthar Axel Tuanzebe leh player thar Alex Telles te a luhtir bakah defence thlawp turin player che muang ber Nemanja Matic a thlang.

United bul ṭantu zingah rinrawl Bruno Fernandes, Paul Pogba leh Marcus Rashford te awm bawk mah se an ṭhat theih dan ber a ni lo a, Edinson Cavani aia Anthon Martial bul ṭantir chuan rah ṭha a chhuah lo.

Nipui transfer bazarah United-in Jadon Sancho lakluh an tum a, an hlawhchham avangin mual sir hmalama che thei player ṭha an nei lo. Rawlthar duhawm Mason Greenwood-a'n FA Cup-ah Liverpool lakah khung mah se cross hun leh shot hun a thlan thiam lohna a lang leh ṭhin a, mual sira che tla tur player ṭha zawk an an la mamawh reng.

Training-na lamah Atalanta aṭanga lakluh Amad Diallo chuan fak hlawh mah se Ivorian winger hi kum 18 mi chauh a ni a, a theihna tak hmuhin a la awm lo. United squad a chhah ṭha a, champion tur em chuan a la chhah ṭha tawk lo niin a lang.

Solskjaer-a'n Sheffield lakah awlsam taka point thum hmuh theih a inbeisei avangin player ṭhenkhat hahchawlhna hun a pe a, a tisual niin a lang. Old Trafford-ah manager hlawhtling Sir Alex Ferguson-a'n inkhel a en a, Scottish manager hian a hun lai angin player-te rilru put hmang a pau khauh tawk lo tih a hmu bawk ang.

Man United hian match 20-ah point 40 an hmu a, anmahni aia match khata khel tlem Man City-in point 41 an hmu tawh. Pep Guardiola hote hian Inrinni zanah Sheffield United an mikhual dawn a, point thum an hmuh ngei a rinawm bakah Manchester United-in tun hnaia che ṭha Arsenal an hmachhawn dawn. Ole Gunnar Solskjaer-a'n a pawimawh hunah tak thutlukna a siam sual avangin league hmahruaina hun ṭha neih an harsat tawh ang.