Arsenal-in Odegaard an hawh

Real Madrid attacking midfielder Martin Odegaard  chuan tun season tawp thleng cham turin Arsenal chu loan hmangin a zawm. 

Real manager Zinedine Zidane hnuaia khelhna hmun chang lo Odegaard hian inkhelh tam a duh a, loan hmanga a chhuahna Real Sociedad bakah Duth club Ajax chuan ngaihven ve bawk mah se Gunners a zawm ta zawk.

Mikel Arteta chuan, "Martin hi kan hriat lar sa a ni a, kum naupangte ni mah se khelmual chhungah tawnhriat a ngah tawh hle. A bik takin tlarhma lamah kan ṭhatpui tur a ni ang," tiin a player thar chungchang a sawi.

Gunners hian an player hlawh hnem Mesut Ozil an chhuahtir a, an academy chhuak Emile Smith Rowe nei tho mah se player chhawr tur neih hnem a pawimawh - kum 22 mi Odegaard hi chhawr nghal theih tur chi a ni ang.

Norway international Odegaard chuan, "Kan ramah chuan Premier League hi a lar hle a, naupang dangte ang bawkin kei pawhin ka en nasa. Khawvel league lian leh ropui ber zinga mi a ni a, ka khel ve thei tur hi ka lawm.

"Arsenal tan hian khelh ka lo chak ve tawh ṭhin, player ṭha leh ropui tam tak pawh an lo awm tawh. A bik takin Cesc Fabregas kha ka player ngaihsan a ni a, a khelh dan pawh ka entawn nasa thei hle," tiin a sawi.