Blasters leh Jamshedpur-ten goal an khung lo

Nilaini zan Indian Super League inkhelah Kerala Blasters leh Jamshedpur FC-ten goal khung an harsat a, team pahnih hi point khata lungawi zir chungin 0-0 in an ṭin.

Inkhel pumpui thlirin Kerala Blasters-in hnehna chan an phu zawk a, mahse, a pawimawh ber goal an khung theih miau loh avangin a tawpah point khata an lungawi a ṭul - team pahnih hian match 14 an khelhah point 15 ve ve an nei a, ISL semifinal khelh beiseina an neih chu an la chhawm nung ve zel. 

South Indian club hian vawi thum ngawt chu woodwork an tih per a, Gary Hooper, Jordan Murray leh Mizo tlangval K. Lalṭhathanga ten woodwork an tih per vek.

Gary Hooper  hian goal-a khunga a inngaih hnuah offside vangin pawmsak a ni lo bawk a, Blasters an vanduai - Jamshedpur-in an vanduaina an sawi duh chuan inkhel ṭantir lam an sawi kai thei a, an striker chhuanvawr Nerijus Valskis-a shot chu Blasters keeper Albino Gomes chuan lo dangin post a per.

Blasters tan K. Lalṭhathanga'n coach Kibu Vicuna rin hlawh chhoin inkhel bul a ṭan a, Bethlehem Vengthlang tlangval hi minute 77-naah lakchhuah a ni. 

Puitea hian bar a tih per bakah Jordan Murray tan ṭha takin a siamsak a, mahse Australian forward hian goal-ah a chantir thei tlat lo; heta Puitea ball pek hi chu midfielder thiam bik ke aṭanga chhuak a ni. Puitea hian Murray tan tho second half-ah cross ṭha zet a nei bawk a, mahse, A League club Central Coast Mariners striker hlui vanneih zan a ni lo. 

Jamshedpur tan rei tak hliam vanga a chawlh hnuin Laldinliana Renthlei chuan inkhel bul a ṭan ve leh ta bawk a, Dinliana hi December-a Bengaluru nen an inkhelh ṭumin a inhliam a, league match li ngawt chu a chawl hman. 

Bolton Wanderers boss hlui Owen Coyle-a'n Dinliana chungah rinna a nghat a, Chennaiyin FC lamah pawh a lo enkawl tawh player hi a dam ṭhat phawt chuan bul a ṭantir zel. 

MPL-a Bethlehem Vengthlang tana lo khel tawh, MPL best defender hlui Dinliana hi MPL best midfielder hlui Puitea nen a lo kirna inkhelah an inhmachhawn a, player inkawmngeih takin ISL-a ball an inchuh vel chu tualchhung football ngainatu tan chuan hmuhnawm a tling. 

Armed Veng South tlangval Dinliana chuan, "100% ka la ni lo a, duh ang zanin ka la khel thei lo. Rei tak chhung inkhel mumal loin hun ka hmang a, zawi zawia hma ka sawn zel avangin 100% turin hun erawh ka mamawh reiin ka ring tawh lo," tiin Vanglaini a hrilh. 

Jamshedpur tan Ricky Lallawmawma chuan inkhel bul a ṭan bawk a, Mizo defender hian Blasters an hmachhawnna inkhelah an khel chhe lo.