Lakers chak tluang a tawp
NBA regular season khelh laiah khualmuala Los Angeles Lakers chak tluang lai chu a tawp. Champion lai Lakers hi nimin zing khan an khingpui Philadelphia 76ers lakah 107-106 in an chak lo.
Eastern Conference hmahruaitu leh Western Conference team ṭha inhmachhawnah hian Joel Embiid a khel ṭha. Ani hian 76ers chak theih nan point 28 zet a nei a, a zawna khualmuala match 10 chak tawh Lakers tana mangchhia thlentu a ni.
Lakers tan ni dang ang bawkin LeBron James a hmuhnawm. American star hian point 34 zet a nei thei, mahse match dang angin thlawptu a nei ṭha tawk lo a, inkhel inhnehtawk takah a vanduai zawkah an ṭan phah.
76ers hian season kal laiah a vawi 13 nana hnehna changin Eastern Conference hmahruaitu an ni. Lakers erawh Western Conference-ah pahnihna an ni, an chungah hian Dallas Mavericks 116-104 a hnehtu Utah Jazz an awm.
Inkhel dangah Brooklyn Nets chuan an player ṭha pathum - Kevin Durant, James Harden leh Kyrie Irving chhawr chungin Atlanta Hawks chu 132-128 in an hneh hram a, team pahnih hi NBA champion thei tur zinga mi an ni ang.
NBA MVP Giannis Antetokounmpo awmna Milwaukee Bucks pawhin Toronto Raptors chu 115-108 in an hneh. Bucks tan hian Antetokounmpo-a'n point 24 a neih bakah rebounds 18 leh assists vawi kua neiin an chak theih nan a thawh hlawk fal leh hle.
NBA Results
Philadelphia 76ers 107 - 106 Los Angeles Lakers
Utah Jazz 116 - 104 Dallas Mavericks
New Orleans Pelicans 124 - 106 Washington Wizards
Brooklyn Nets 132 - 128 Atlanta Hawks (OT)
Milwaukee Bucks 115 - 108 Toronto Raptors
Indiana Pacers 116 - 106 Charlotte Hornets
Oklahoma City Thunder 102 - 97 Phoenix Suns
Golden State Warriors 123 - 111 Minnesota Timberwolves
Cleveland Cavaliers 122 - Detroit Pistons 107
Sacramento Kings 121 - 107 Orlando Magic
Denver Nuggets 109 - 82 Miami Heat
San Antonio Spurs 110 - 106 Boston Celtics