Auba-a'n a inlan loh chhan a sawi

Arsenal captain Pierre-Emerick Aubameyang chuan tun hnaia a boruak tawn chungchang a sawifiah a, inkhel loa a awm chhan chu a nu damlo awmpui a ngaih vang niin a sawi.

Kum 31 mi Auba hian tun hnaia Gunners match pahnih chu a khel lo. Manager Mikel Arteta-a'n an striker inlan loh chhan hi 'chhungkaw thil vang' tih bakin a sawi lo a, hei hian rin dan a ti tam hman hle.

Khawthlang media ṭhenkhat chuan Auba leh a nupui an inṭhen niin an lo sawi hman. Tunah erawh thu chiang a hriat ta a, tun kar tawpa Manchester United nen Premier League match an khelh hunah pawh a inlan theih a beiseiawm.

Auba chuan, "Tun hnaia ka dinhmun ngaihtuaha min rawn zawt tute chungah ka lawm. Ka nau hriselna a ṭha lo a, a dinhmun a ṭhat loh avangin a bula ka awm a ngai a ni.

"Tunah chuan a dinhmun pawh a ziaawm tawh a, ka lo kir leh tawh ang. Arsenal chhungkua ten min thlawpzia an lantir pawh khan min ti lawm takzet a ni," tiin a sawi.

North London club hian an league match hnuhnung berah Southampton 3-1 in an hneh a, he inkhela goal khungtu Alexandre Lacazette chuan a goal khung lawm nan a ṭhianpa Auba a thlawpzia a lantir a, jersey number 14 chu a kut hmangin a lantir.